Контаминацијата во Јапонија се шири
23 март 2011Јапонските власти денеска објавија предупредување водата за пиење воТокио да не им се дава на бебињата. Владата, притоа, ги потврди претходните извештаи на медиумите дека во пречистителните станици во токискиот водовод е регистрирана радијација која може да им наштети на здравјето на новороденчињата.
Високото радиоактивно зрачење од оштетената атомска централа Фукушима 1, во меѓувреме, ги отежнува напорите за повторно вклучување на системите за ладење во реакторите за да се спречи катастрофалното топење на нивните јадра. Тековните поправки што ги спроведува фирмата која управува со централата, Тепко, на реакторот 2, мораа да бидат прекинати, а експертите оттаму повлечени. Јапонското министерство за здравство, инаку ја прошири забраната за продажба зеленчук од погодениот регион.
Штетите сега не можат да се проценат
Покрај со стравот од атомска катастрофа, јапонската влада е соочена и со растечкиот број човечки жртви, но и на економски штети од катастрофалниот земјотрес и разурнувачкото цунами, кои најтешко ја погодија североисточна Јапонија. Штетите на објектите, инфраструктурата и претпријатијата во овој дел на Јапонија би можеле да достигнат од 16 до 25 трилиони јени, или од 197 до 308 милијарди долари, соопшти денеска јапонската влада. Значителен ефект врз вкупните штети ќе имаат и прекините на снабдувањето со електрична енергија, поради оштетените или исклучените атомски централи. Во проценката на економските трошоци, како што беше соопштено, не се вклучени последиците од можна атомска катастрофа. Тоа за многумина во Јапонија засега е незамисливо. Но, ако мора да се смета на тоа...
„... дека ќе има топење на реакторското јадро, кое конечно за илјадници години ќе направи неподобен за живеење еден цел регион од 50 километри околу централата Фукушима и дека облаци со радиоактивен материјал би можеле да стигнат и до Токио и да го замрат, барем привремено, севкупниот живот и економска активност, тогаш штетите ќе бидат драматично поголеми“, вели Јан Посер, еден од менаџерите во швајцарската банка Сарасин.
Автор: СН/ЕМФ/ртр/ап/дв
Редактор: Елизабета Милошевска Фиданоска