За европската перспектива на ЈИЕ треба да се разговара и пред одржувањето на Минхенската конференција
16 септември 2009"Разговаравме околу оперативните можности како да се организира процесот кој може да доведе до посакуваниот успех. Тука треба да се поттикнат иницијативи од Европскиот и националните парламенти за да се омекне грчкиот отпор. Рака на срце, навистина се‘ уште немаме функционален Европски парламент, потоа претседателот на Европската комисија не е потврден, ќе биде ли Барозо или не, престојат и парламентарни избори во Германија и кон крајот на октомври, или почетокот на ноември и формирање на влада. Затоа е важно во 2010 година да се оди во решавачкиот процес кој ќе води кон успех, а тоа значи членство на Македонија во ЕУ и НАТО ”, изјави социјалдемократот Валтер Колбо за Дојче веле, коментирајки ја и иницијативата на Волфганг Ишингер проблемот на Македонија со името да се најде на дневен ред и на Минхенската конференција за безбедност и соработка.
"Мислам дека за оваа тема не треба да се чека да се проговори дури во февруари, на Минхенската конференција, иако тоа е добро место за дебата. За Југоисточна Европа треба да се дебатира и порано. Оваа тема мора да се стави во средиштето ,зашто станува збор за иднината на Европа. Ние се‘ уште сме присутни со војници во Босна и Херцеговина, на Косово... На југоисточните земји им треба европска перспектива за Европа да може да се развива како континент на мирот и да се обезбеди развој и благосостојба на луѓето во нивните држави. На патот на ова стои Грција со една многу тврда позиција, која мора да се премости! Сега Грција е во ситуација во која не само што стои на патот на европското обединување, туку и нејзе и‘ е потребно нешто од Европа. Грција е во тешка економска ситуација. Потребна и‘ е поддршката од Светската банка и од Меѓународниот монетарен фонд за сопствената ликвидност како држава. Во оваа смисла, ќе се бара солидарноста на Грција за европскиот развој. Ако Грција не е кооперативна, тогаш мора да се размислува и за санкции!
Ишингер: Минхенската конференција треба да се занимава со проблемот со името
Претседавачот на Минхенската безбедносна конференција, Волфганг Ишингер, вчера по средбата со македонскиот претседател Ѓорге Иванов во Берлин, изјави: „Конференцијата за безбедност од Минхен има за цел да ги разгледа проблемите како на европската, така и на трансатлантската безбедност и да се потруди да изнајде решенија за проблемите кои се отворени. Во групата се‘ уште нерешени прашања за безбедноста на Европа се вбројуваат и оние од регионот на Југоисточна Европа, статусот и името на Македонија. Затоа, сметам дека е важно и дека е и моја задача, Минхенската конференција да се позанимава со прашањето како може да придонесе за решавање на спорот. Секогаш е подобро да се разговара за проблемот, отколку да не се разговара. Не можам да ветам дека Минхенската конференција ќе го реши проблемот. Но сметам, дека е значајно да понудиме форма за дискусија, за предлозите кои веќе беа понудени, но и за компромисите кои се на маса. Тоа е она што можам и што ќе го понудам!
Автор: Силвера Падори
Редактор: Елизабета Милошевска Фиданоска