Жртви при демонстрациите во Иран

Повеќе од сто илјади незадоволни граѓани излегоа вчера на улиците во Техеран, давајќи му поддршка на Мир Хосеин Мусави. Пред присутните на протестниот марш тој изјави дека „ќе ја плати секоја цена“ за да ги поништи резултатите од изборите, но призна дека нема многу надеж дека ќе успее во тоа.

Појавување на Мусави на протестите во Техеран беше неговото прво појавување во јавност, по изборите во петокот. Официјалните резултати покажуваат дека неговиот противник, Махмуд Ахмадинеџад, освоил 62 проценти од гласовите, што беше одобрено и од духовниот лидер на Иран, ајатолахот Али Хамнеи, кој, всушност, ја има вистинската власт во земјата.

Мусави ги обжали резултатите од изборите пред Советот на чуварите на револуцијата, тело составено од правници и судии, но истакна дека Советот не бил неутрален во однос на изборните резултати од петокот. „Немам верба во нив“ изјави Мусави, вчера на неговата интернет-страница.

Во секој случај, Советот на чуварите на револуцијата вети дека ќе ги разгледа жалбите за изборен фалсификат, поднесени од Мусави. Се очекува Советот да ја соопшти својата одлука за десет дена.

Автор: ТТ/ЕМФ/ап/афп

Редактор: Александра Трајковска