Добитници на „Sony World Photography Awards 2017“
Победничките фотографии на „Sony World Photography Awards 2017“ прикажуваат тажни судбини, но и сцени полни со убавина. Ви ги прикажуваме победничките фотографии на најголемиот натпревар на фотографии во светот.
Прво место во категоријата „Спорт“
Јуан Пенг од Кина ги фотографираше близначките Лиу Бингкуинг и Лиу Јуие. Тие тренираат напорно уште од најрана возраст.
Прво место во категоријата „Природа“
Вил Барард-Лукас од Англија ги прикажува животните кои се активни ноќе, како и нивното природно опкружување. Таква е и оваа хиена во африканската савана.
Прво место во категоријата „Секојдневие“
Серијата фотографии „Похотата на другите“ на германската фотографка Сандра Хојн го прикажува најстариот и еден од најголемите бордели во Бангладеш - Кандапара. Во него живеат и работат повеќе од 700 проститутки. Кандапара е ограден од надворешниот свет. Во него раснат и многу деца.
Прво место во категоријата „Мртва природа“
Хенри Агудело од Колумбија се посветува на едно темно поглавје од историјата на својата земја. Таму во последните 50 години исчезнаа повеќе од 130.000 луѓе. Многу од мртвите досега не се идентификувани. Впечатливи особености, како на пример парче кожа со тетоважа, помагаат при идентификацијата.
Прво место во категоријата „Актуелности и вести“
Среде борба со т.н. Исламска држава овој либиски војник, припадник на специјална единица, прави пауза. Италијанскиот фотограф Алесио Роменци овој речиси нестварен момент го „уловил“ во ноември 2016 година, во Сирте.
Прво место во категоријата „Предел“
Ништо друго освен тишина и ширина. Фредерик Бујкс ја направил оваа фотографија некаде во Албанија. Белгискиот фотограф сака да прикаже промени на пределите кога настапува зима. За својата серија фотографии не само што е награден во категоријата „Предел“, туку ја освои и наградата за фотограф на годината. Висината на наградата е 25.000 фунти.
Прво место во категоријата „Актуелни теми“
Таснеем Алсултан од Саудиска Арабија со фотографијата од оваа самохрана мајка и нејзиниот син фрла поглед зад кулисите на строгото муслиманско општество во својата татковина. Во Саудиска Арабија разводите се многу ретки. Разведените жени често се избегнувани.
Прво месо во категоријата „Архитектура“
На Донги не му е примарна естетиката. Кинескиот фотограф сака преку своите фотографии да го прикаже градот како чисто визуелна форма.
Прво место во категоријата „Портрет“
Дали постои перфектна жена? Ако му се верува на фотографот Џорџ Мајер, тој ја има овековечено оваа жена во серијата портрети „Светло. Сенки. Перфектна жена“. Фотографот игра со силни контрасти, со светло и сенки. Со тоа неговите модели изгледаат како привид, речиси нестварни.
Прво место во категоријата „Концептуална уметност“
Сабине Катанео допира многу чувствителна тема - еутаназијата: „Сакав да визуализирам, без притоа да ги прикажам луѓето, за да се избегне лажна емпатија“, вели фотографката од Швајцарија. „Мојата реконструкција прикажува автомобил во кој двајца Германци во 2007 година во Швајцарија му ставија крај на својот живот со помош на организација која е фокусирана на еутаназија.“