Грција да ги продава островите за излез од кризата

Грција треба да ја разгледа можноста за продавање на дел од нејзините острови за да се извлече од кризата и огромниот надворешен долг, предлагаат двајца германски парламентарци од редовите на владејачкото мнозинство на канцеларката Ангела Меркел. Јозеф Шларман од ЦДУ и Франк Шефлер, економски експерт од редовите на Либералите велат дека тоа е најлесниот начин за Грција да излезе од кризата.

„Оние кои се инсолвентни треба да продадат се’ за да ги отплатат кредитите. Грција поседува згради, компании и ненаселени острови, кои можат да се искористат за намалување на долгот“, изјави Шларман за весникот „Билд“.

Грчкиот премиер Јоргос Папандреу утре во Берлин ќе има средба со канцеларката Меркел, а двајцата пратеници остро се противат на можноста на Атина да и се дава помош. „Канцеларката не смее да и ветува на Грција никаква помош“, вели Шафлер во текстот во „Билд“ под наслов „Продавајте ги островите банкротирани Грци! Продајте го и Акрополот!“

Друцас ја отфрли идејата

Грчкиот заменик министер за надворешни работи Димитрис Друцас ја отфрли идејата во интервју за германската државна телевизија. „Ваквите препораки не се соодветни во овој момент“, рече Друцас. Во разговорот, Друцас тврди дека на Грција не и е потребна директна финансиска помош, туку солидарност и притисок на Берлин врз водечките финансиски институции за поволни кредити.

Грција има околу шест илјади острови, од кои само 227 се населени. „Билд“ во денешното издание оди и чекор понатаму, па во коментарот на оваа тема им порачува на Грците: „Ние ќе ви дадеме пари, вие дајте ни го Крф!“

Автор: БГ/АТ/ројтерс/ап/афп

Редактор: Александра Трајковска