Грција го бара Фронтекс на границата со Македонија

За да ги претстави проширените овластувања на Агенцијата за заштита на границите - Фронтекс, еврокомесарот Димитрис Аврамопулос го одбра преминот „Капитан Андреево“ на турско-бугарската граница. На оваа надворешна граница на ЕУ и досега имаше ЕУ-граничари. Сега менаџирањето со границите треба да стане уште подобро, вети бугарскиот премиер Бојко Борисов на заедничката прес-конференција. Тоа значи дека жицата на границата ќе стане подолга и повисока и ќе биде заштитувана и со помош на Фронтекс.

Во употреба ќе бидат и најмодерни камери. Бегалците на тој начин би требало да бидат приморани да ги употребуваат регуларните гранични премини, да се регистрираат и да побараат азил на лице место. Би требало да бидат спречени илегални преминувања на границата, какви што минатата година во Бугарија, Грција и долж Балканската рута имаше во огромен број.

„Европа нема да стане тврдина“, рече Аврамопулос, отфрлајќи ги обвинувањата од активистите кои се занимаваат со судбините на бегалците. „Вратата останува отворена за оние на кои навистина им е неопходна заштита.“ Во иднина треба да доаѓаат само оние кои се навистина политички прогонувани или бегаат од војна. Таканаречените економски мигранти треба да бидат побрзо препознавани, меѓу другото и со помош на Фронтекс, и потоа да бидат враќани во татковините. Посилниот граничен менаџмент би требало да дејствува и како заплашување - за оние кои сакаат да тргнат во насока на Европа тоа воопшто и да не го пробуваат. Борисов оцени: „Ова е нашата последна шанса за обезбедување на границите.“

Новиот „Супер-Фронтекс“ би требало во тоа да им помага на членките на ЕУ, но не и да ја преземе во свои раце заштитата на границите.

Морската граница е проблем

Шефот на Фронтекс, Фабрис Леџери, смета дека  може да ја подобри контролата на границите на ЕУ со повеќе персонал и поголеми финансиски средства. „Првпат има и подготвеност да се соработува при контролите на море“, рече Леџери денеска во Бугарија. Тој вети дека ќе биде продолжена и проширена средоземноморската мисија „Тритон“ меѓу Либија и Италија. Фронтекс во рамки на таа мисија веќе има 18 бродови и над 500 офицери. Екипите меѓутоа не се задолжени да ја држат морската граница непроодна, туку да спасуваат бегалци од морето и да ги водат до Италија.

Според ЕУ, обезбедувањето на морската граница не функционира како што треба. Годинава досега преку море во Италија пристигнаа речиси 130.000 мигранти, или речиси исто толку како и минатата година. „Италија е под притисок. Ќе ѝ помогнеме кога ќе ни каже што ѝ е неопходно“, вети еврокомесарот Аврамопулос.

Грција веќе има поднесено барање до новата мисија на Фронтекс. Грчката влада бара ЕУ-граничарите да помогнат во обезбедувањето на границата со Македонија, значи таму каде што почнува Балканската рута.