Вообичаено млако

Ставајќи ги ископаните спортски вредности на кантар, македонската кошаркарска репрезентација оствари највисока цена - пат на европското првенство. Имаше возбудлив квалификационен од во друштво на Украина, Унгарија, Босна и Херцеговина и Велика Британија. Селекторот Марин Докузовски го потенцира резултатскиот континуитет во кој влезе македонската репрезентација.

„Навистина доста сум задоволен од она што се случуваше оваа година, затоа што навистина имав голем притисок, бидејќи после успешниот настап на нашата репрезентација на ЕП во Полска, нормално беше сите да очекуваат да се повтори тој успех, повторно да се пласираме, и јас сум среќен бидејки Македонија за првпат, двапати во низа се пласира на ЕП. Сметам дека веќе станавме далеку и поискусни и сите репрезентации не‘ гледаат со поголем респект, и веќе Македонија има свое место во европскиот крем.“

Ќе остане ли ракометот и натаму македонската спортска перјаница?

Машката ракометна селекција ја бие битката за место на наредното Европско првенство. Во група со Унгарија, Босна и Херцеговина и Естонија засега е со одлични изгледи за едно од првите две места. Девојките откако победнички го завршија квалификациониот турнир во Грција со 3 победи, во баражот за пат на Мондијалот во Бразил, се соочуваат со Шпанките. Екипа силна, но не и непремостлива, смета Тања Андрејева.

„Јас лично сум задоволна од противникот што го добивме - Шпанија, со оглед на тоа дека во тој шешир беа Романија и Црна Гора. Ќе биде исклучително тешко, но мислам дека со заеднички напори, со добри подготовки и со голема желба ќе успееме да се пласираме после овој двегодишен пост.“

Фудбалот е приказна за себе

Најубавата фудбалска приказна во 2010-та ја испиша Работнички. Кога се избори за место во квалификациите за Лигата на Европа никој и не помислуваше дека ќе стигне до 3-то коло, дури до славниот Ливерпул. Двапати загуби со по 2:0 и во Скопје и на Енфилд Роуд, но останува задоволството поради спектакуларната атмосфера создадена со доѓањето во Македонија на еден од најславните светски клубови.

На истекот од летото Македонската фудбалска репрезентација, амбициозно влезе во квалификациите за европското првенство во 2012. Нов пат, тежок и трнлив со порази од Словачка во Братислава и од Русија во Скопје, со победа над слабата Андора и реми рамно на пораз, во Скопје против Ерменија. Следи во март гостување против Република Ирска. Македонскиот фудбал, сепак, имаше свој амбасадор во високото друштво. Горан Пандев! Кога во првиот ден од 2010-та потпиша за Интер и дојде под закрила на харизматичниот Жозе Мурињо, започна неговата фудбалска бајка. Освоен Купот на Италија, потоа Скудетото. На Ноу Камп триумф во Лигата на шампионите против Баерн. Последниот скапоцен камен на круната беше неодамна во Абу Даби на светското клупско првенство. Чудни се понекогаш критериумите на институциите кои прават листи на успешност, на чиј врв во случајов не е Горан Пандев! Според Агенцијата за млади и спорт, признанието спортист на годината во Македонија го доби 30-годишниот кајакар Атанас Николовски. Беше 7-ми во К-1 на светското првенство во Словенија. Еве ги сеќавањата на Николовски врзани за Светското првенство.

„Мислам дека таму за малку ни‘ избега медалот. Во полуфиналето јас бев првопласиран и тоа со околу две и пол секунди предност пред останатите натпреварувачи. Но, кајакот е таков спорт во кој возењето од полуфиналето не се смета, и во финалето се почнува од почеток. Меѓутоа, не је сметам за пропуштена шанса, бидејки следува она што е најважно за нас - Олимписките игри во Лондон.“

На наредната страница:

Магичниот простор меѓу јажињата

Магичниот простор меѓу јажињата

Жарко Арсовски останува најдобриот македонски каратист. Се испроба со елитата на светското првенство во Белград, за на крај бронзениот сјај да заблеска на неговите гради. Примислав Димовски, добродушниот македонски боксерси џин-тешкаш имаше неколку значајни влегувања во магичниот простор меѓу јажињата.

„Оваа година, во првите шест месеци можеби тргна добро, но лошо завршивме со ЕП во Москва, каде се надевавме на повеќе, но не успевме, сите завршивме во првото коло. Во втората половина имаше, во октомври имаше европски куп во Украина, каде малку се поправивме. Јас таму го освоив бронзениот медал и освоив неколку турнири, од кои еден во Бања Лука, каде традиционално учествуваме секоја година, и секако Златниот гонг.“

На врвот на врвовите

Од познатата кугларска лоза Маневи, најновиот изданок е веќе во созвездието на славните. Бранко Манев, откако јуниорските обврски ги заврши со светската титула и рекорден број на соборени кегли, влезе на голема врата и во сениорска конкуренција. Два бронзени медали се неговиот учинок на неодамнешното Европско првенство. Има спортот свои посебни патеки, димензии, дострели тешко мерливи, а исклучително респектирани. Едната од нив е што води на највисоката точка, на Монт Еверест. Здравко Дејановиќ е 4-от Македонец, кој се искачи на врвот на врвовите, по северната насока од страната на Тибет. Игор Димовски беше на водената патека, што води од Довер до Кале. На 2 август, на Илинден, го преплива Ла Манш. Тој е четврото македонско име на оваа славна делница.

Во 2010-та македонскиот спорт се ослободи и од големото петно што со години го носи. Веќе не е меѓу неколкуте земји во светот без олимписка тартан-патека. Со донација од Европскиот олимписки комитет Охрид ја доби атлетската патека со светски стандарди. Беше промовирана токму од славниот Сергеј Бубка!

Автор: Златко Калински

Редактор: Елизабета Милошевска Фиданоска