Вонредна состојба во делови од Германија

Големите поплави што ја зафатија Баварија однесоа пет жртви. Нуркачите во една куќа во Зимбах на Ин открија тела на тројца возрасни, соопштија властите. Во Јулбах, кој исто така припаѓа на округот Ротал-Ин, од водата е извадено тело на жена. Причините за смртта засега не се познати.

Во окрузите Ротал-Ин и Пасау вчера е прогласена состојба на катастрофа. Во општините Зимбах на Ин, Трифтерн и Тан цели улици се однесени од водата, а голем број куќи пловат по површината. Портпарол на полицијата во овој дел на Баварија извести дека во некои места луѓето успеале да се спасат само благодарение на тоа што се качиле на покривите. Водата дошла одеднаш и брзо.

Трифтерн извесно време беше пресечен од останатиот свет поради тоа што сите мостови беа однесени од надојдената вода. Во меѓувреме, како што се вели, состојбата во регионот е малку смирена. Властите проценуваат дека материјалната штета ќе биде во двоцифрен милионски износ. Баварскиот министер за финансии Маркус Зедер најави брза финансиска помош.

Нема изгледи за подобрување во наредните денови

Невремето вчера беше разурнувачко и во други делови на Германија, како во покраината Северна Рајна Вестфалија. Во округот Везел по долготрајниот дожд е прогласена вонредна состојба. Нивото на водата во реката Исел во текот на ноќта достигна два метра, што е 1,5 метар повеќе од нормалното ниво. Противпожарните служби јавуваат за особено голем број акции и во регионот на Диселдорф. Постојано се испумпува водата од поплавените подруми и полните тунели. Големи дождови имаше и во покраината Саксонија. Во една од болниците во Лајпциг спасувачите мораа да испумпуваат вода од одделот за итна помош.

Според метеоролозите, потенцијал за невреме ќе има најмалку до недела.

Погледнете ги снимките од ужасот кој зад себе го остави невремето:

#videobig#