Алпскиот рај: Во светот на Хајди
Швајцарските планини се рај за одмор за многумина. Тие се познати, меѓу другото, и поради приказната за Хајди на Јохана Шпири. Прошетка низ слики во кантонот Граубинден, по трагите на Хајди и Петар.
На ливада
Овде може да избегате од градот, да се радувате на маргаритките без бука и прашина. Иако авантурите на Хајди се фикција, Швајцарите не пропуштија на една од најпознатите детски книги во светот да ѝ доделат и реално место. Ова е Хајдиалп на Оксенберг кај Мајенфелд.
Хајди била овде
Дел од Хајдиалп, се разбира, е и куќата на Хајди. За и посетителите од далечната Јапонија да можат да видат како се живее во убавиот свет во планините на швајцарскиот кантон Граубинден. За светска слава, покрај големиот број преводи на различни јазици, приказната за Хајди доживеа благодарение на анимираниот јапонски филм од 1974 година.
Туризам и сточарство
Една од најважните стопански гранки во Швајцарските Алпи, покрај туризмот, е сточарството. Тешко достапните долини високо во планините и алпските ливади налето им припаѓаат на планинарите и сточарите со нивните стада. Пред настапувањето на зимата, животните се спуштаат во долините, како овде, во Валс.
Кози и јарци
Во планинскиот свет на Граубинден козјото месо и млеко долго играле важна улога во исхраната. Овие животни, кои се едноставни за одгледување, одлично се снаоѓаат на планинските стрмнини. Така повторно доаѓаме до Хајди, која со драго срце му правела друштво на Петар и неговите кози.
Природа и луксуз
Додека недопрениот свет на Хајди за повеќето први читатели на книгата бил недостижно место по кое копнееле, многу богати туристи ги освојувале швајцарските планини уште во 19 век. Наместо во едноставни колиби, тие отседнувале, на пример, во луксузниот хотел во Зилс (десно на фотографијата). Меѓу познатите гости на Зилвапланерзе биле и Томас Ман, Лукино Висконти и Макс Либерман.
Богати и убави
Откако на средината на 19. век бил отворен првиот хотел, Сент Мориц се развива во едно од најпознатите места во Швајцарија за лекување и зимски спортови. Притоа, важно било да се види и да се биде виден. Луксузните хотели имаат за задача да го направат престојот на џет-сетот пријатен и удобен.
Бела зима
Швајцарските планини назима се особено привлечни и - поради силниот швајцарски франк - навистина ексклузивни. Можностите за уживање во природата и планините се огромни. Како на пример овде, на скијачката патека во близина на Давос.