4 милиони бегалци од Ирак - како да им се помогне? | Свет | DW | 19.04.2007
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

4 милиони бегалци од Ирак - како да им се помогне?

Во Женева два дена за тоа расправаа претставници на 60 држави и на десетици хуманитарни организации

Четири милиони Ирачани досега ги напуштија своите домови и побегнаа на посигурни места. Половината од нив најдоа прибежиште во странство, пред се’ во Јордан и Сирија. “Многу е тешко да им се понуди заштита на бегалците. Безбедноста всушност мора да биде гарантирана од државата. А во драмата во Ирак таа безбедност не може вистински да биде гарантирана. Поради тоа и имаме толку многу бегалци” - вака го наслика проблемот комесарот на ОН за бегалци Антонио Гутереш.

Ирачката влада е подготвена да даде 25 милиони долари за бегалците во странство. Но, најголемиот дел од хуманитарните организации сметаат дека многу поголем проблем е згрижувањето на бегалците внатре во Ирак. Две третини од Ирачаните, на пример, немаат сигурен пристап до вода за пиење. А тука се и секојдневните атентати. “Нужно е политичко решение за ставање крај на религиозно мотивираното насилство и за спроведување национално помирување. Тоа ќе овозможи луѓето во Ирак повторно да можат да живеат безбедно” – укажа Гутереш.

Ирачкиот министер за надворешни работи Хошијар Зебари забележа дека медиумите ја искривувале сликата и оти во многу делови на земјата и не било толку несигурно. “Многумина од бегалците се од главниот град. 80 до 90 насто од насилството се случува во Багдад. Оттука, решавачко е главниот град да го направиме побезбеден” – рече Зебари. Но, до тогаш ќе помине уште доста време. Затоа, сега е побитно конкретно да им се помогне на луѓето, нагласи комесарот Гутереш.

В петок со ситуацијата на ирачките бегалци ќе се занимаваат и министрите за внатрешни работи на ЕУ, во која, според проценките, веќе има околу 20 илјади бегалци од Ирак. САД, пак, најавија декадека привремено ќе прифатат дополнителни десетици илјади ирачки бегалци.