22 жртви во човечко стампедо во Индија

Најмалку 22 лица загинаа, а над 30 се повредени во стампедо на пешачки мост на железничката станица Елфинстон во Мумбаи, Индија.

Мостот бил преполн со патници, кои се засолниле од поројниот дожд, а во исто време се обиделе да ја напуштат станицата, соопштил портпаролот на железницата.

Според полициски информации, некој викнал дека мостот ќе се урне, што предизвикало паника кај луѓето, па сите почнале да трчаат. Очевидци, пак, велат дека стампедото се случило откако неколку жени се лизнале на скалите од мостот.

Лизгањето било предизвикано од обилните дождови што го зафатија овој крај. Болниците во Мумбаи се преполни со луѓе, кои биле повредени во човечкото стампедо.

Индиските власти соопштија дека е можно бројот на починати да расте. Инаку железничката станица Елфинстон во Мумбаи (поранешен Бомбај) се наоѓа во близина на бројни деловни згради и е една од најфрекфентните во градот. Финансиската и филмска метропола на Индија со околу 20 милиони жители е еден од најголемите градови во светот.