1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

Јужноамериканските држави се солидаризираат со Еквадор

Шефовите на дипломатии на 12-те држави од континентот му дадоа поддршка на Еквадор во случајот со основачот на Викиликс, Џулијан Асанж.

Држави од Јужна Америка му изразија неограничена поддршка на Еквадор во судирот со Велика Британија околу случајот со основачот на Викиликс, Џулијан Асанж. Министрите за надворешни работи на 12-те јужноамерикански земји ги повикаа двете страни да го решат спорот низ преговори и ги осудија заканите на британските власти за употреба на сила врз амбасадата на Еквадор во Лондон, кадешто се крие Асанж.

„Го поддржуваме правото на државите да даваат политички и дипломатски азил... и изразуваме солидарност и поддршка на владата на Еквадор по заканите врз нејзината амбасада во Британија“, се наведува во заедничката изјава.

Еквадор во четвртокот (16.08) му додели политички азил на Асанж кој престојува во просториите на амбасадата веќе два месеца. Британските власти се заканија дека нема да му дозволат на Асанж да ја напушти земјата и дека ќе сторат се’ за да го уапсат и да го израчат во Шведска каде е осомничен за сексуален напад.

Асанж вчера (19.08) и‘ се обрати на јавноста прв пат од март и тоа од терасата на амбасадата на Еквадор, при што ги повика САД и претседателот Барак Обама да престанат со `ловот на вештерки` против Викиликс. Тој повика на ослободување на новинари и `бунтовници` и на општа борба против репресијата, но не зборуваше за своите понатамошни потези.