1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Панорама

Што значи Божик за муслиманите?

Германија е земја со христијански обичаи и празници, тие се составен дел на општествениот живот. На празникот особено му се радуваат децата, зашто добиваат подароци. Што значи, пак, Божик за муслиманските деца?

default

Писма со желби за Божик од децата од Германија

Божик во Германија се слави како најголем празник, а највозбудени се децата. Пред Божик се палат адвентски свеќи, секој ден на адвентскиот календар се отвора по едно ново прозорче, се пишуваат ливчиња со своите желби до детето Исус. Божик е ден кога се потсетува на раѓањето на Исус Христос. Празникот значи и добивање подароци, како што вели осумгодишниот Филип, за кого е важно и тоа што се собира заедно целото семејство. И дванаесетгодишната Кристине блеска кога зборува за Божик:

„Го сакам Божик, тогаш сите сме заедно, има подароци, сите се радосни и се смеат. Се радувам и зашто има убави јадења.“

Културни разлики

Божик го следат и многу ритуали што се повторуваат секоја година. За многу луѓе во Германија бројните симболи поврзани со празникот уште од детството не се само дел од нивната биографија, туку и од колективната свест: на Божик во центарот на вниманието не е само сопственото семејство, туку сите некако се заедно.

Weihnachten

Подароци за Божик во кругот на семејството

Сите? Речиси сите. Зашто, и Кристине има неколку соученици кои не го слават Божик: „Две деца од нашето одделение се муслимани. Неодамна и‘ реков на една другарка: „ќе ти дадам подарок за Свети Никола“. Меѓутоа, таа не знае кој е свети Никола, зашто тие не го слават.“ Кристине не знае зошто муслиманите не слават Божик. Но, веќе забележала дека постојат културни разлики:

„Тие слават празник што кај нас не постои, мислам дека е Рамазан Бајрам.“

Меѓу два света

Бидејќи Божик во Германија е општествен настан со силни христијански корени, многумина муслимани се растргнати: од една страна сакаат да учествуваат, зашто живеат во ова општество, од друга страна тие не се дел од христијанството. Но, Божик во Германија може да се слави и без да се биде религиозен. Одлуката зависи од тоа каков е личниот став. Армин од Босна и Херцеговина го слави Божик, како што вели, зашто живее меѓу Германци, а тие се мнозинство.

Неговата босанска сосетка Емина, која се декларира како муслиманка, вели дека таа не го слави, зашто тоа не е нејзин празник.

Ramadan Fastenbrechen in Essen

Муслиманите го прославуваат Рамазан Бајрам

За децата од муслимански семејства не е едноставно да стојат настрана, додека најголемиот дел околу нив купуваат божикни елки, одат на божикни панаѓури и купуваат подароци, вели Хилија, чии родители доаѓаат од Турција:

„Јас сум малку љубоморна, зашто не добивам никакви подароци. Ако размислам подобро, и германските деца не добиваат подароци за Рамазан Бајрам.“

Рамазан Бајрам за муслиманските деца е еден вид Божик. Со овој голем празник завршува исламскиот свет месец Рамазан. Тој се слави во кругот на целото семејство, се јаде празнична храна, децата добиваат подароци. Но, и покрај тоа, останува мал копнеж, вели Хилија: „Ние немаме божикна елка, а мене таа многу ми се допаѓа. Но, би било глупаво ако ние муслиманите би накитиле дома божикна елка.“

А всушност, токму една божикна елка е соодветна како дрво на зближување. Него го има во обичаите на различни култури и не е христијански симбол. Но, само во детските сеќавања припаѓа неразделно кон Божик, зелено, накитено, осветлено.