1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

Штајнакер предупредува од манипулација со историјата

Германската амбасадорка во Македонија говореше на дебатата по повод 50-годишнината од Елисејскиот договор потпишан меѓу Франција и Германија.

default

„Манипулацијата на историјата е најстарата форма на злоупотреба на моќта. Оној што погрешно ја интерпретира и го претставува минатото погрешно ги има на располагање сегашноста и иднината. Јас ќе се радувам ако германските и француските историчари ги делат своите искуства во анализирањето на историјата во дијалог со македонските историчари, бидејќи сите три страни ќе профитираат од тоа", рече амбасадорката на Германија Гудрун Штајнакер, на отворањето на дебатата посветена на 50-годишнината од потпишувањето на Елисејскиот договор меѓу Германија и Франција, која денеска се одржа во Скопје.

Амбасадорката Штајнакер рече дека 50 години по Елисејскиот договор денес е тешко да се препознае колку смелост и напор биле потребни за тоа. Еден резултат од овој процес е, вели, и соочувањето во двете земји со историјата на другиот, а чесната конфронтација со сопствената историја и туѓата историја е дел од помирувањето и разбирањето.

Nikola Poposki Außenminister Mazedonien

Никола Попоски

Според шефот на македонската дипломатија Никола Попоски, Елисејскиот договор помеѓу Германија и Франција понуди еден уникатен модел на помирување и претставува бесценето наследство за многу генерации и 50 години подоцна. Чинот на потпишувањето го зацврсти мирот во срцето на Европа, ги формираше клучните ѕидови на стабилност и просперитет на тогашниот се уште млад заеднички пазар, кој подоцна созреа во денешната ЕУ, рече Попоски.

Според него, прославувањето на 50-годишнината од потпишувањето на овој мировен договор и примерот на германско-француското пријателство покажува дека надминувањето на предрасудите е можно и дека дијалогот и меѓусебното почитување на историјата, традициите, културата на другиот претставуваат плоден развој за сите. Оцени дека Елисејскиот договор има и голема историска важност во однос на процесите на помирување во Европа воопшто, како и во градењето поголема доверба помеѓу земјите во контекст на ЕУ и на процесот на проширување.

„Земјите од Западен Балкан по период на конфликти во 90-те години на свој начин го следеа овој пример на помирување и мислам дека успеаја да ги избришат историските разлики кои постоеја во регионот, а кои беа потенцијал за конфликтни ситуации. Тоа го постигнавме благодарение на заедничките визии за стратешките цели, а тоа е дека сите иднината ја гледаме во ЕУ, посочи Попоски.

Новата амбасадорка на Франција Лоронс Оер посочи дека на овој јубилеј Париз и Берлин сакаат да потсетат дека придаваат огромно значење на овие односи, а основната порака која ја испраќаат е дека француско-германското пријателство треба да биде отворено, но и отворено кон другите.

Staatspräsident Charles de Gaulle und Bundeskanzler Konrad Adenauer unterzeichnen den deutsch-französischen Freundschaftsvertrag

Францускиот претседател Де Гол и германскиот канцелар Аденауер при потпишувањето на договорот

„Иднината на Балканот е иднина на помирување. Не сакаме да даваме лекции. Потребни беа децении за да бидеме способни да напредуваме, туку едноставно сакаме да ги појасниме работите и да одиме напред, рече Лоронс.

Со Елисејскиот договор потпишан на 22 јануари 1963 година години од страна на германскиот канцелар Конрад Аденауер и францускиот генерал Шарл Де Гол беше затворено поглавјето на германско-француското непријателство и ривалство и отворено ново поглавје на пријателство и долгорочна соработка во Европа.