1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Економија

Скапите автомобили се повторно на цена

Деновиве во Женева се одржува 81. меѓународен саем на автомобили, кој трае до 13 март. Изминатите две години расположението беше воздржано поради економската криза, но сега доминираат и новите и поскапи модели.

default

Новиот Форд Фокус на саемот во Женева

Кризата беше вчера, автомобилската бранша денес повторно е на лентата за претекнување. Токму вакво расположение владее на саемот во Женева, каде се претставуваат околу 260 автомобилски фирми со над 700 модели од преку 30 држави. Годинава владееше трка за штандови, истакнува генералниот директор на автосаемот, Ролф Студер:

„Ние организаторите сме малку нерасположени што моравме да разочараме некои излагачи кои бараа големи изложбени простори“.

Заживување на пазарите во Азија и Америка

Според проценките на експертите, прометот во автомобилската бранша оваа година ќе се зголеми за преку шест проценти. Фолксваген минатата недела пријави рекорден биланс. Пазарот во Азија, особено во Кина, доживува бум. Автоконјуктурата оди како подмачкана и во Америка. Само во Европа не оди најдобро, истакнува Норберт Рајтхофер, првиот човек на управниот одбор на БМВ:

„Би рекол дека западноевропскиот пазар е поделен. Во Германија во јануари поминавме многу добро, со двоцифрен раст. Во остатокот од Европа постои поделеност - на земјите на север, Велика Британија, Шведска, Финска, Данска, им оди добро. Во земјите од југот, како Шпанија и Италија, е потешко, ќе потрае додека да го стигнат нивото од 2007 година.“

Flash-Galerie Genf Autosalon 2011

Цената на бензинот како фактор

И покрај еуфоричното расположение благодарение на подемот во Азија и Америка, постојат ризици. Моментно растечките цени на нафтата и бензинот можат лесно да предизвикаат главоболки, велат експертите. Руперт Штадлер, шефот на автомобилскиот концерн „Ауди“ има поинакво мислење:

„Ние, автомобилските производители, последниве години направивме големи чекори кај потрошувачката на дизел и бензин. Новиот Ауди А6 кој го презентираме и ќе се појави на пазарот годинава, направи вистински исчекор во оваа насока од 20 проценти. Ги презедовме значи вистинските мерки.“

Темата алтернативен погон во Женева има приоритет. Презентирани се 40 нови електро или автомобили на хибриден погон или на гас. Електроавтомобилите доминираат особено кај француските излагачи во Женева. Во Германија лани во промет беа пуштени помалку од илјада електроавтомобили, што не е чудно, според експертите, зашто тие се едноставно прескапи и се‘ уште неадекватни за секојдневието.

Инаку, Фолксваген на саемот во Женева презентира нов Тигуан и нов Голф кабрио. Опел ги претставува подновената Корса и електроавтомобилот Ампера, Форд, пак, ќе го прикаже новиот Фокус.

Автосалонот Женева е трет по големина саем во светот, по Франкфурт и Париз. Се проценува дека годинава ќе го видат седумстотини илјади посетители.

Автор: Паскал Лехлер / Жана Ацеска

Редактор: Елизабета Милошевска Фиданоска