Продолжуваат штрајковите во Грција | Европа | DW | 24.09.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Европа

Продолжуваат штрајковите во Грција

Синдикатите во Грција за денеска повикаа на нов 48-часовен генерален штрајк против владините мерки за штедење. На протести излегуваат наставниците, новинарите, државните службеници...

Во Грција продолжуваат штрајковите во државниот сектор, образованието, општинската администрација и осигурителните компании против планираните масовни отпуштања од работа и прераспределби на државните службеници, кои се поставени како услов од меѓународните кредитори на земјата за добивање финансиска помош.

Федерацијата на државните службеници (АДЕДИ) за денеска најави 48-часовен штрајк на наставниците. Од 10 до 13 часот работата ќе ја прекинат и новинарите, а во протестот ќе се вклучат и даночните инспектори и пилотите. Во нов петдневен штрајк излегуваат и вработените на универзитетите.

Од вчера 48-часовен протест започнаа професорите во средните училишта, вработените во осигурителните компании и општинската администрација. Протестите се последица на договорот меѓу Владата во Грција и меѓународните кредитори до крајот на овој месец да бидат прераспределени и отпуштени од работа 12.500 државни службеници, а до крајот на годинава вкупно 25.000. Во период од осум месеци тие ќе добиваат 75 отсто од платата, а доколку бидат префрлени на друго работно место, ќе бидат отпуштени. Претстојните намалувања на бројот на државните службеници е многу алармантна состојба во Грција, каде невработеноста веќе достигна рекордни 28 проценти.