1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

Нуланд: Само Македонија и Грција можат да донесат одлука за името

Спорот за името меѓу Македонија и Грција нема да биде во фокусот на американската дипломатија ниту во мандатот на новиот американски помошник државен секретар за Европа, Викторија Нуланд.

При претставувањето на своите приоритети, Викторија Нуланд вчера (13.11) рече дека во минатото лично вложила многу енергија во надминување на спорот меѓу Македонија и Грција, но во овој момент одлуката е на двете држави, а не на САД.

„Во врска со Македонија, и јас самата во минатото, особено во 2008 година на Самитот на НАТО во Букурешт, лично ги засукав ракавите. Се сеќавам и како се среќавав со премиерот Груевски и со грчките водачи во мојата дневна соба, кога се обидувавме да го решиме спорот. Верувам дека има две или повеќе формулации кои би требало да можат да бидат прифатливи за двете страни. Се работи за дијалог, лидерство и избор, меѓу двете страни, да одберат. Ги знаете кои се предностите кои се на маса ако Македонија и Грција успеат да дојдат до договор. Секако, ќе продолжиме да го поддржуваме процесот на Нимиц, да навиваме за решение, но само вие можете да донесе соодветна одлука“, изјави Нуланд, која беше американски амбасадор во НАТО за време на самитот во Букурешт и со тоа директно вклучена во разговорите за прием на Македонија.

Предупредување до Босна и Херцеговина

Нуланд одговараше на новинарско прашање, а во претходно подготвените забелешки кои ги претстави пред собраните дипломати и експерти во Атланскиот Совет на САД, таа се осврна на повеќе спорови на Балканот, но не и на спорот за името. Прашање кое Нуланд го најави како фокус на интересот е решавањето на спорот за Кипар. Помошничката државен секретар рече дека состојбите драматично се смениле во Грција, Турција и во Кипар, и во трите земји политичарите сфаќаат дека е време да се реши овој спор, пред се‘ поради откривањето на наоѓалишта на гас јужно од островот кои кипарските Грци не можат да ги експлоатираат без согласност на кипарските Турци. Во своите забелешки таа се осврна и на напредокот во разговорите меѓу Србија и Косово, велејќи дека САД даваат полна поддршка на напорите на европската дипломатска претставничка Кетрин Ештон за постигнување договор. Од балканските земји, Нуланд ја предупреди и Босна дека, доколку нејзините политичари не постигнат согласност за повеќето отворени прашања, САД ќе мора да ја преиспитаат својата политика.