1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Теми

Многу возбуда, малку страв

На Франкфуртскиот аеродром „вриеше“ од новинари, микрофони и камери. Денеска изутрина (4.02) за Сочи заминаа германските претставници. Ѕвездите, како Марија Хефл-Риш во авион се качија со високи цели и само малку страв.

Ана Зајдел од нервоза речиси цела ноќ не склопила око. Петнаесетгодишната лизгачка на кратки патеки е најмлада во германскиот тим и изутринава беше со дел од Олимпијците со многу помпа испратена на Зимските олимписки игри. „Не познавам многу од спортистите. За мене пример беше Магдалена Нојнер, но таа веќе не е дел од тимот“, вели младата Зајдел.

Покрај нејзе и скијачката ѕвезда Марија Хефл-Риш, во авионот денеска се качија уште 28 спортисти и 50 членови на германската делегација. Дел од вкупно 153-те германски атлети се веќе во Сочи, а другите ќе пристигнат до петок, кога се отвора Олимпијадата.

Денеска германскиот тим беше испратен симболично, со голем медиумски интерес, официјални говори, но не многу големи дилеми околу политичката ситуација во Русија, за која се дискутира со месеци. „Не само што ја следевме дискусијата, туку и учествувавме во неа. Тоа го носиме во куферите, но сега во преден план е спортот“, изјави шефот на мисијата, Михаел Веспер.

Хефл-Риш додаде: „Медиумите постојано прашуваат за тоа. Можеби не е сѐ во ред, но сега одиме лично таму и ќе може да си создадеме слика на лице место.“

Спортските цели на германскиот тим се големи. „Сакаме да го повториме резултатот од Ванкувер, во 2010 година. Пред четири години освоивме 30 медали. Оттука, целта е тешка и амбициозна“, нагласи генералниот директор на Германскиот олимписки спортски сојуз (ДОСБ), Михаел Веспер.

Скијачката Викторија Ребенсбург пред четири години освои златен медал во велеслалом. „Не би имала ништо против ако на враќање во рачниот багаж имам нешто мало, сјајно“, вели 24-годишната Ребенсбург.

Најпознатото лице на германските зимски спортови е нејзината колешка Хефл-Риш. Двократната олимписка победничка се радуваше поради медиумската турканица на аеродромот. „Убаво е кога има вакво одушевување. Ми олесна што конечно стартуваме“, рече таа пред околу 100 новинари и 15 телевизиски екипи. Освојување повторно на два златни медала „не може да се изнуди“, но убавото на Олимписките игри е што, како што додава Хефл-Риш, „таму имам пет шанси и ако една се пропушти, за неколку дена веќе следува нова шанса“.