1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Европа

Матео Ренци подготвен за премиерската функција

Новиот италијански премиер најверојатно ќе биде Матео Ренци. Тој е претседател на Демократската партија, од која доаѓаше и досегашниот премиер Енрико Лета.

Италијанските медиуми со денови шпекулираа за „предавање на штафетата“, но уривањето од власт на премиерот Енрико Лета се одигра многу бргу. Мнозинството членови на Демократската партија во четвртокот гласаа за заминување на Лета од функцијата. На чело на бунтот беше токму Ренци, кој од позиција на партиски лидер одлучи да ја преземе и премиерската палка.

Ренци, кој е актуелен градоначалник на Фиренца, неодамна ја презеде лидерската позиција во партијата, а во последниот период ја критикуваше владата на својот партиски колега за неодлучност во однос на преземањето реформи. Сега тој ветува драматичен пресврт.

Italien Regierungsbildung Giorgio Napolitano und Enrico Letta

Претседателот Џорџо Наполитано и поранешниот премиер Енрико Лета

„Сите заедно мораме да се извлечеме од калта. Не се работи само за примопредавање на власта. Не се работи за продолжување во ист правец, туку за поинакви цели и поинакво темпо“, рече Ренци.

Ренци е личност која впечатливо се изразува. Една од причините за неговиот брз политички подем е и вниманието на медиумите кое успешно го привлекува. Ренци има 39 години, и тој на некој начин е производ на ерата на Берлускони, особено што и самиот има работено во маркетинг-агенција во сопственост на неговото семејство.

Во јавноста тој се претставуваше како личност која е подготвена да ја размонтира старата партиска елита. Сега му е потребен само уште благословот од претседателот Џорџо Наполитано за да ја преземе функцијата, која отсекогаш ја посакувал. Доколку тоа се случи, Ренци ќе биде и најмладиот премиер во историјата на Италија.