1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Економија

Лавров: ЕУ не може да ги менува договорите за „Јужен поток“

ЕУ не може еднострано да ги подложи на ревизија договорите кои Русија ги склучи со балканските држави за изградба на гасоводот „Јужен поток“, изјави шефот на руската дипломатија, Сергеј Лавров.

Договорите што Русија ги склучи со балканските земји за изградба на гасоводот „Јужен поток“ се дел од меѓународното право и Европската унија не може нив еднострано да ги подложи на ревизија, изјави рускиот министер за надворешни работи Сергеј Лавров во интервју за утрешниот број на белградскиот весник „Политика“.

Лавров во интервјуто се задржал на руско-српските односи нагласувајќи дека за Русија е „важно зближувањето на Србија со Европската унија“.

„Почетокот на преговорите за членство на Србија во ЕУ не им нанесува штети на нашето партнерство и на реализиацијата на крупните економски и инфраструктурни проекти, вклучувајќи го тука и енергетскиот сектор“, изјавува Лавров во интервјуто.

Тој натаму нагласува дека Москва смета оти и нејзините „српски пријатели“ размислуваат исто, истакнувајќи дека односите меѓу Русија и Србија не можат да бидат заложници на надворешни фактори, имајќи предвид дека двете земји ги поврзуваат „длабоки чувства на пријателство, разбирање и доверба, повеќевековна традиција на блискост меѓу народите и сеќавањето на братството по оружје“.