1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

Комеморација за жртвите од Холокаустот во Скопје

Во Скопје со комеморација беше одбележан Јом Ашоа - Националниот комеморативен ден на Холокаустот. Сеќавање на шест милиони Евреи убиени во Втората светска војна

Во Меморијалниот центар на Евреите во Скопје денеска беше одбележан Јом Ашоа - Националниот ден на холокаустот што државата Израел го одбележува во знак на сеќавање на востанието на Евреите во Варшавското гето во 1943 година и на шесте милиони Евреи убиени во Холокаустот.

„Нека поменот на шесте милиони невини жртви од кои еден милион деца ни биде основа во грижата и совеста на младите генерации да им овозможиме да научат за Холокаустот и за страдањата од Втората светска војна. Само така младите може да извлечат морална порака и на адекватен начин да се соочат со предизвиците на модерните времиња и да ги задржат традиционалните вредности на живеење во заедници и верскиот соживот“, рече во обраќањето пред присутните Берта Романо-Николиќ, претседателката на Еврејската заедница во Македонија.

Комеморацијата се одбележа со промоција на книгата „Ти веруваш - 8 погледи за холокаустот на Балканот“ од Леа Коен и со палење свеќи. Шесте комеморативни свеќи ги запали Бехар Израел најстариот член на заедницата кој го преживеа холокаустот.