1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Панорама

И во Германија се крадат шини и кабли

Корисниците на германската железница чекаат со часови, телекомуникациските компании остануваат без сигнал или интернет. Крадците на метали им предизвикуваат голема штета на компаниите, а често се служат и со насилство.

Најчесто доаѓаат ноќе. Под закрила на ноќта ги кинат електричните кабли и семафорите, или на други места крадат бакарни кабли на телекомуникациските провајдери. Крадците бараат бакар, месинг или старо железо. Бизнисот со овие суровини е многу вносен. За еден тон бакар може да се добијат и до 10 илјади евра. Затоа и не изненадува што крадците не пребираат која суровина да ја украдат.

Во моментов најмногу страда Германската железница (ДБ). Само во 2011. година, 11 илјади возови стигнале со задоцнување. Поради кражбите евидентирани се 150 илјади минути доцнења. Проценката е дека штетата за ДБ изнесувала околу 15 милиони евра. Покрај железницата, мета на крадците се и телекомуникациските и енергетските компании, како и трговците со метал. Од тие причини, три големи концерни - ДБ, енергетската компанија РВЕ и Здружението на германските трговци со метал одлучија да се здружат во битката против крадците.

Крадците се’ повешти

„Во последните 4-5 години кражбите во Германија се се’ почести и она што го забележуваме е дека кражбата на бакарните кабли станува се’ попрофесионална. Јасно е дека тоа оди во правец кон организиран криминал“,

Künstliche DNA erschweren Buntmetalldiebstahl

Работници на ДБ поставуваат вештачка ДНК за заштита на шините

вели Филип Бланк од германскиот Телеком. Оваа компанија минатата година регистрирала 320 кражби и штета од околу 820 илјади евра. Сега трите компании сакаат да постават систем на рано предупредување преку кој би разменувале информации, бидејќи често се случува кражбите да бидат регионално концентрирани.

Со вештачко ДНК означување ќе бидат собрани генетски отисоци од крадците, во потрагата ќе бидат ангажирани и хеликоптери.

Но, на германската железница и‘ е особено тешко да ја надгледува својата мрежа која е долга 34 илјади километри. Шефот за безбедност на железницата, Јенс Оливер Фос, вели дека кражбата на пругите, во принцип не претставува опасност за патниците, но го отежнува патувањето за сите.

„Кога ќе се случи нешто такво сите семафори се на црвено и сите возови се запираат“, вели Фос.

Раст на осигурувањето

Трговците со метали, пак, се жалат на раст на трошоците. Голем дел од фирмите во меѓувреме ангажирале и приватно обезбедување, но мораат да плаќаат и енормно повисоки суми за осигурување на суровините.

„Трошоците за осигурување пораснаа од 300 до 400 отсто“, вели шефот на Здружението на трговците Ралф Шмиц.

Од енергетскиот концерн РВЕ велат дека досега не се соочиле со проблем со снабдувањето со енергија, но предупредуваат од опасноста која ги демне крадците.

„Кога се работи за кабли под висок напон, животите се ставаат на коцка“, велат од РВЕ.