Истрагата за падот на „Кингерот“ ќе трае најмногу една година | Македонија | DW | 09.02.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

Истрагата за падот на „Кингерот“ ќе трае најмногу една година

Повторно отворената истрага за авионската несреќа во која загина екс-претседателот на Македонија,Борис Трајковски, се очекува да трае од шест до 12 месеци, најави главниот истражител Омер Кулиќ.

default

Петнаесетчлениот меѓународен тим го сочинуваат експерти од БиХ, Хрватска, Србија, како и од Македонија, а нивните имиња нема да бидат соопштени на јавноста со цел да се избегне евентуално влијание врз нивната работа. Ова го соопшти денеска (09.02) на прес-конференција во Скопје главниот истражител за повторно отворената истрага за „Кингерот“ Омер Кулиќ.

„Сметаме дека овој тим ќе биде објективен, коректен и професионален. Имињата на луѓето вклучени во тимот нема да и‘ бидат познати на јавноста за евентуално да не може да се влијае врз истражителите. Го сочинуваат седум воздухопловни инженери, тројца пилоти, двајца контролори и двајца дизајнери на воздухопловни процедури. Сметаме дека тој тим е доволно стручен за да ја изврши работата коректно“, рече Кулиќ.

Според него, извештајот од првичната истрага не задоволува, затоа што е завршена за многу брзо време од неполни два месеца што, оценува, е многу брзо за ваква обемна истрага. Тој очекува повторената истрага согласно доставените материјали да биде завршена до крајот на годинава, а за нејзиниот тек македонската јавност ќе биде информирана на секои два месеца.

Boris Trajkovski Mazedonien

Борис Трајковски настрада при пад на „Кингерот“

„Оваа Комисија не ја утврдува вината и одговорната личност, туку фактите и тоа како дошло до несреќата. За тоа дали во таа несреќа постои одговорно лице или лица и дали ќе бидат процесуирани ќе одлучува обвинителството. Штом биде готов, извештајот ќе биде доставен на обвинителството и објавен на веб-страницата на Министерството за транспорт и врски на БиХ“, рече Кулиќ.

Тој прецизира дека предмет на истрага во Македонија ќе биде операторот односно организацијата која тогаш управувала со потребите за авиопревоз на Владата и Дирекцијата за цивилно воздухопловство. Во Босна ќе бидат истражувани навигациските средства на аеродромот во Мостар, процедурите кои биле применети на тој аеродром и самото место на несреќата. Во текот на истрагата ќе биде направена симулација на целиот лет со истиот тип на авион онака како што се случи за време на несреќата. Ќе бидат вештачени инструментите во авионот кои биле калибрирани во Белград и авиосервисот во Германија каде „Кингерот“ бил сервисиран.

Кулиќ упати апел до македонската јавност кој има какви било сознанија вредни за истрагата да и‘ ги достави на оваа Комисија во текот на истрагата, оти по нејзиното завршување тие нема да бидат релевантни, потсетувајќи дека прикривањето на докази претставува кривично дело.

Regierungsflugzeug von Mazedonien

Македонскиот владин авион

На новинарско прашање како ја оценува првата истрага, повтори дека таа била направена многу брзо, за два месеца, најверојатно поради притисок од јавноста, поради што не било можно, како што вели, да се соберат сите докази. Во врска со тврдењата на адвокатот на семејствата на загинатите Игњат Панчевски дека располага со докази и оти досега никој лично не го контактирал, Сотир Костов, кој е претставник на Комитетот за воздухопловни инциденти на Република Македонија и е набљудувач - претставник на државата во оваа истрага, рече дека во 2009 година во два наврати се сретнал со него и му предложил да ги достави доказите до МВР и до обвинителството, но тој тоа го одбил.

„Нема да ги коментирам причините зошто, бидејќи тој не е присутен во моментот. Ќе направиме напори деновиве да обезбедам средба со адвокатот за да му ги достави тие докази на надлежниот главен истражител“, рече Костов, кој за време на првата истрага беше претседател на Комисијата која ја водеше постапката за прибирање докази за несреќата.

Истрагата за „Кингерот“ е повторно отворена на барање на Република Македонија, а по дополнително прибрани материјални докази доставени од Министерството за внатрешни работи на Република Македонија до босанското Министерство за транспорт и врски. По добивањето нови докази од Македонија, властите во Босна и Херцеговина во почеток на декември, лани повторно ја отворија истрагата за авионската несреќа од 6 февруари 2004 година, во која загина тогашниот македонски претседател Борис Трајковски и осум други патници и екипажот.