1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

Десетици деца загинаа во бродоломот кај Турција

Меѓу 60 загинати во бродот кој потона во близина на турскиот брег повеќе од половината се деца. Мнозинството од мигрантите биле Палестинци.

Најмалку 60 луѓе загинаа откако брод со над 100 илегални имигранти денескa (06.09) потона во Егејско Море во близина на градот Мендерес, во турската провинција Измир.

Властите соопштија дека повеќе од половината од загинатите мигранти биле деца, меѓу нив и три бебиња. Најголемиот дел од мигрантите биле Палестинци.

Бродот потоа потонал на околу еден километар оддалеченост од брегот. Капетанот, неговиот помошник и 43 патници успеале да се спасат. Според извештај на Си-Ен-Ен Турк на малиот рибарски брод имало 102 патници. Целта на бродот не е позната, но на потегот на кој се наоѓал, меѓу Турција и Грција, обично пловат бродови со мигранти кои сакаат да стигнат до ЕУ. Според првите изјави на спасените, тие сакале да стигнат до Велика Британија.