1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Економија

Германија си го бара златото на проверка

Германските сојузни контролори побараа од Централната банка редовно да го контролира квалитетот на златото кое се чува во странски банки. Бундесбанката признава дека детална контрола никогаш не е спроведена.

Германските медиуми денеска известуваат дека Централната банка одлучила да побара дел од своите резерви на злато да бидат вратени во земјата заради нивна проверка. Според првичните информации, во земјата ќе бидат префрлени околу 50 тони злато, чиј квалитет ќе биде проверуван.

Бундесбанката соопшти дека златото ќе биде стопено, затоа што тоа е единствениот начин да се провери неговата чистота, а потоа повторно ќе биде излиено во прачки.

Германските сојузни ревизори во понеделникот побараа од властите да извршат проверка на барем дел од 3.400 тони злато, вредно околу 133 милијарди евра, колку што земјата поседува како стратешка резерва во странство.

„Германските резерви на злато во странство никогаш досега не се исконтролирани за да се провери нивната автентичност и квалитет“, пишуваат ревизорите во извештајот.

Bundesbankpräsident Jens Weidmann

Претседателот на Бундесбанк, Јенс Вајдман

Како и многу други централни банки, и германската дел од своите резерви чува во силни финансиски институции во странство, а најголемите резерви се стационирани во Федералната банка во Њујорк, во „Банк де Франс“ и во „Банк оф Ингланд“.

Праксата е востановена одамна, уште во периодот кога Германија чувствуваше потреба да ги заштити своите резерви поради стравот од заканите од Советскиот сојуз и од неговите источноевропски сателити.

Но во последниве децении, Бундесбанката не сметаше за неопходно ниту дека треба да ги преброи своите резерви на злато, а не пак да ја провери неговата автентичност и квалитет, и сметаше дека гаранциите од партнерите се доволни во тој поглед.

На почетокот на годинава, група пратеници во сојузниот парламент побараа да ги прегледаат резервите на злато во француската Централна банка, но беа одбиени од властите во Париз со образложение дека нивната банка не е место за посети.