1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

Вулканска пепел го запре авиосообраќајот над Европа

Пепелта исфрлена по активирањето на вулкан на Исланд денеска доведе до затворање на речиси сите поголеми аеродроми во северна Европа и Велика Британија и предизвика хаос во воздушниот сообраќај.

default

Патниците на аеродромот Хитроу во Лондон се соочуваат со голем број откажани летови

Воздушниот сообраќај над Велика Британија е во колапс поради облаците од вулкански прав и пепел, што изминативе денови ги исфрла вулканот на исландскиот глечер. Најголемиот британски авиопревозник „Бритиш Ервејс“, објави дека биле присилени да ги откажат сите летови во текот на денешниот ден, што полетуваат од лондонските меѓународни аеродроми Хитроу и Гетвик. Проблеми со редовните летови има и во Манчестер, Ливерпул, Њукасл и Бирмингем. Според Службата за контрола на авио-сообраќајот, ситните честици од вулканскиот прав се лепат на моторите на авионите и предизвикуваат сериозни оштетувања на леталата. Според мерењата на Службите за сигурност на аеродромите, облакот од прав и пепел достигнал височина од околу 18.000 метри и ќе ја помине Британија за 13 часа, но ќе бидат потребни неколку дена воздухот да се исчисти од честиците на пепелот.

Слична е состојбата и на северот на Европа. Властите во Норвешка, Финска, Шведска и Данска веќе затворија поголем дел од аеродромите и забранија прелети над нивниот воздушен простор. За попладнево слични мерки најавија и аеродромите во Белгија, Холандија и западна Германија. Од Европската контрола на воздушниот сообраќај соопштија дека очекуваат пепелниот облак да пристигне во тие делови од Европа попладнево, но се’ уште нема дефинитивна одлука за затворање на воздушниот простор. Забраните ги погодија и поголемите аеродроми во Швајцарија, Италија и Франција каде голем број патници се соочуваат со откажаните летови.

Ескпертите велат дека пепелните облаци се екстремно опасни за авионите. Забележани се повеќе случаи во кои вулканската пепел целосно уништила авионски мотори и ја загрозила безбедноста на патниците.

Автор: БГ/АТ/афп/ројтерс

Редактор: Елизабета Милошевска Фиданоска