Буш му нуди на Иран директни преговори за атомскиот спор | Теми на денот | DW | 01.06.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Теми на денот

Буш му нуди на Иран директни преговори за атомскиот спор

Понудата е условена со барање Иран да прекине со облагородување на ураниум

Џорџ Буш

Џорџ Буш

„Сметам дека е многу важно да го решиме тој проблем по дипломатски пат и јас денеска решив САД да ја преземат водечката улога во решавањето“ – објави во Вашингтон американскиот претседател Џорџ Буш. Тој притоа му порача на Иран дека мора да остане без атомско оружје и мора да прекине со облагородување на ураниум – што треба да биде и верификувано; тоа би биле и услови за САД да седнат на преговарачката маса. Буш искажа почитување за иранскиот народ, наследство и историја, и надеж дека владата на таа земја ќе реагира на барањата на меѓународната заедница и нема да се изолира од светот, нема лекоумно да троши пари за програма за атомско вооружување – оти тоа би ги ангажирало капацитетите и би го спречило растежот на иранското стопанство.

Претходно и министерот за надворешни работи Кондолиза Рајс ја обелодени желбата на САД за „нови и позитивни односи“ со Иран. И таа, како и Буш, како предуслов не побара откажување, туку само запирање на облагородувањето на ураниум, но наведе и редица други теми кај кои американската влада очекува промена на иранската политика. Рајс тука ги спомна и финансиската подршка за терористички групи на Блискиот исток и за насилнички активности во Ирак. „Се надеваме дека оваа понуда да учествуваме во разговорите, ако Иран го запре облагородувањето на ураниум, ќе создаде клима за акции – или во преговори, или пак во Советот за безбедност на ОН“ – рече Рајс.

Непосредно пред нејзиниот настап, од неофицијални извори во Вашингтон беше речено дека претседателот Буш последните денови повеќе пати разговарал со Москва и Пекинг за од таму да добие подршка за санкции, доколу Иран не покаже готовност за компромис на американската понуда за директни разговори.

САД и Иран веќе речиси 27 години немаат дипломатски односи и во спорот околу иранската атомска програма досега немаше директни американско-ирански разговори, туку ставовите на Вашингтон ги пренесуваше европската тројка. Од иранска страна во изминатите недели можеше да се осознае интересот за директни разговори со САД, а и претседателот Ахмадинеџад му испрати писмо на Буш, на кое, меѓутоа, не доби одговор.

Со новиот потег сега Иран е ставен под притисок. Денеска министрите за надворешни работи на петте постојани членки на Советот за безбедност и на Германија ќе одржат консултации околу новите иницијативи во атомскиот спор.