1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Панорама

Багети од автомати во Париз

Парижаните се навикнати да купуваат производи од автомати. Карти за воз, кондоми, минерална вода, чоколада. Францускиот главен град сега има нешто ново – машина за багети. Тоа не е само автомат, туку и мала пекарница.

default

Иноваторот и пекар Жан Луј Хехт пред својот изум - автомат за печење багети

Топол и свеж – тоа е суштинската работа за францускиот леб, кој е крцкав одозгора и мек во внатрешноста. Жан Луј Хехт, човекот зад машината за багети, ги печел нив целиот работен век во својата пекарница во еден мал град на истокот од Франција. И, еден ден тој направи пекарско откровение.

„Ги знам сите мои муштерии. Некои од нив, кога ќе заборавеа да дојдат пред времето за затворање, ми ѕвонеа, бидејќи живеев над пекарницата, и се симнував долу, малку разговарав и им продавав багети. Но, кога се враќав жена ми знаеше да се жали дека вечерата се оладила, дека никогаш не сум присутен ... Така, еден ден и’ реков да не се грижи, бидејќи ќе се опремам со машина“, вели Хехт.

Baguette

Парижаните и странците тврдат дека багетите од автоматот се подобри од тие во традиционална пекарница

Допечување на багетите во автоматот

Веројатно неговата жена ќе била задоволна и ако тој направил само автомат за продавање на испечени багети. Но, во тој случај потрошувачите во доцните часови ќе се нашле затечени како купуваат не само ладен леб, туку и со суви засеци. Така, тој имал паметна идеја да ја наполни својата машина со багети кои се испечени само две третини, бидејќи тие остануваат свежи не само неколку часа, туку дури три дена. Машината го завршува печењето како што багетите се приближуваат до предниот дел од редот за продажба.

Американката Меган Стул, која доаѓа од сосема друго соседство со нејзините пријатели само за да ја користи машината, смета дека таа е одлична.

„Не ти се допаѓа идејата за одење во традиционална пекарница... 'Бонжур мадам’... и сите тие работи“, прашува новинарот.

„Зависи ако се чувствувам добро со мојот француски јазик тој ден. Ова е полесно во сред ноќ, кога јас и најчесто сакам багет“, одговара американката Меган Стул.

Народот купува, пекарниците се плашат за иднината

Brötchen, Frühstücksbrötchen, Bäcker

Хехт им порачува на традиционалните пекарници, кои стравуваат за својот профит, или да се прилагодат на новите услови, или да исчезнат од пазарот

И Французите редовно одат да фрлат некое евро во машината, како Пол Девер кој вели дека е подготвен да жртвува некои мали задоволства, само овде да го купи својот леб.

„Тоа е супер погодно. Не мора да стоите на ред, а и лебот е добар за цената. Морам да признаам дека некогаш одам и во традиционална пекарница во близина на ова место, бидејќи жената што го продава лебот е екстремно шармантна, но лебот не е толку добар, така што тоа е компромис, како и многу други работи во животот“, вели Девер.

Париз има 1 203 пекарници. Без сомнение тоа е најгустата мрежа во светот за дистрибуција на леб. Традиционалистите велат дека би било културна катастрофа, ако се загрози нивниот опстанок. Но, создавачот на машината за багети, Жан Луј Хехт вели дека тие мора или да се адаптираат или да умрат.

Франција не е луда по автоматите како Јапонија, каде има по еден автомат на секој 23-ти жител и каде се продаваат од јајца до будистички молитви. Но, Франција оди натаму, вели Хехт.

Автор: Џон Лоренсон/ Александар Методијев

Редактор: Александра Трајковска