Абас во Москва | Свет | DW | 31.07.2007
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

Абас во Москва

Русија продолжува со двојна игра во внатрепалестинската борба за превласт: му вети подршка на претседателот на Палестинците Махмуд Абас, но по него во Москва треба да дојде и водачот на Хамас Калед Машал.

default

Претседателот на Палестинците Махмуд Абас

Рускиот министер за надворешни работи Сергеј Лавров го прими Махмуд Абас љубезно, но без преголема срдечност. Како член и на Блискоисточниот квартет, Лавров го уверуваше гостинот дека е најважен соговорник на палестинска страна: “Ве подржуваме во цврсто уверување дека сте легитимен претставник на сите Палестинци. Ги подржуваме сите ваши чекори што ги преземате за повторно воспоставување стабилност и единство на палестинскиот народ, како и за продолжение на мировниот процес”.

Палестинците се далеку од единство – зборот на Абас се слуша само во Западниот брег на Јордан, додека во појасот на Газа владее Хамас. Абас се обиде да ја придобие Русија на своја страна: “Има многу работи за кои треба да разговараме. Тука е проблемот за тешката состојба на Палестина, проблемот на палестинското единство, блискоисточниот мировен процес, мировната конференција. За такви прашања вредеше да се состанеме и да разговараме”.

Но, многу од овие нешта се базираат врз иницијативи од Западот. Русија пак генерално води курс на значителна дистанца од Западот и нема да и’ биде лесно да ги надмине разликите меѓу Абас и Калед Машал, водач на ривалското движење Хамас, чие доаѓање се навестува во Москва, како и меѓу Израел и Сирија.

Хорст Клојзер