Полицијата бара засилување за протестите против Г20

Иако во Хамбург беа распоредени речиси 20 илјади полицајци за време на одржувањето на самитот на групата 20 најразвиени земји во светот, тоа нема да биде доволно, велат од германската полиција. Откако вчера дојде до жестоки судири со околу 12 илјади демонстранти во повеќе населби во градот, утрово состојбата ескалира. Демонстрантите блокираа повеќе улици, запалени се десетици автомобили и направена е голема материјална штета. Од вчера до денеска повредени се повеќе од 120 полицајци. Поради тоа, полицијата во Хамбург побара засилување од други делови во земјата. 
Против самитот на Г20 протестираат околу 100 илјади луѓе. Полицијата вели дека идентификувала најмалку 8.000 демонстранти кои се подготвени на насилство. Голем дел од нив се радикални левичари. Од безбедносни причини, утрово беше откажана билатералната средба на шефот на германската дипломатија Зигмар Габриел со американскиот државен секретар Рекс Тилерсон. И германскиот министер за финансии Волфганг Шојбле мораше да откаже настап од истите причини. Повеќе медиуми јавуваат дека првата дама на САД, Меланија Трамп не можела да излезе од својата резиденција поради загрозена безбедност.