Масовен собир на Севернокорејците против Америка

Севернокорејската државна телевизија КРТ денеска дистрибуираше снимки од антиамериканскиот протестен собир кој вчера се одржал во Пјонгјанг. На плоштадот Ким Ил Сунг се собраа над 100.000 луѓе, јави државната агенција КЦНА. На насобраните им се обратија повеќемина говорници. Сите партиски членови и граѓани на Пјонгјанг се решени „целосно да ги истребат од земјата американските империјалисти“, рече заменик претседателот на Градскиот комитет на владејачката Работничка партија, Чеј Хак Чул.

Масовни собири од ваков тип не се невообичаени во Северна Кореја. На тој начин се изразува поддршка на граѓаните за политиката на комунистичката влада. Во изјавата која беше емитувана во петокот, а потоа уште еднаш беше прочитана на собирот во Пјонгјанг, властодржецот Ким Јонг Ун го нарече американскиот претседател Доналд Трамп „духовно болен“ и човек „со деменција“ и му се закани со „оган“. Ваквите зборови на Ким доаѓаат по воинствените тонови на Трамп и заканите за „целосно уништување“ на Северна Кореја. Трамп на генералното собрание на ОН во Њујорк нагласи дека нуклеарната програма на Северна Кореја е закана за цел свет.