Ќе следат корекции во Eнциклопедијата на Македонија?
23 септември 2009Неопходни се корекции во неколку одредници од Енциклопедијата на Македонија, што оправдано предизвикуваат незадоволство кај научната јавност од албанската етничка заедница и не се научно фундирани. Оваа констатација денеска за „Дојче веле“ ја соопшти претседателот на МАНУ, Георги Старделов, од кого медиумите очекуваа прва официјална изјава. Тој ќе разговара и со академиците од албанската етничка заедница, кои најавија откажување на своето членство, доколку не бидат изменети спорните оценки и квалификации околу автохтоноста на народите на територијата на Македонија, за ОНА и за лидерот на ДУИ, Али Ахмети.
Се состана и Главниот редакциски одбор, кој ја подготви двотомната Енциклопедија на Македонија.
Британската амбасада со писмено барање до МАНУ
До МАНУ денеска писмено се обрати и Британската амбасада која побара да се исправи и отстрани текстот дека британските специјални единици САС, ги обучувале припадниците на ОНА.
„Воопшто немаше таква обука од силите на Велика Британија. Тоа е сосема јасно и апелирам до МАНУ тоа да го коригира. Многу е важно за ваква книга сите факти да бидат потврдени и точни и сите толкувања и тези да бидат сеопфатни и да не бидат пристрасни“, изјави британскиот амбасадор во Македонија, Ендру Ки.
Двотомното енциклопедиско остварување, кое беше промовирано минатата недела се‘ уште не е достапно до широката публика иако и други амбасади од соседни земји, пред се‘ Албанија и Бугарија, искажале интерес за фактите и квалификациите во него сврзани со овие држави и односите со Македонија.
Во меѓувреме писмо со незадоволство до МАНУ испратија претставници на македонскаста дијаспора од Австралија, реагирајќи што во Енциклопедијата нема делови за историските корени на Античка Македонија.
Автор: Александар Чомовски
Редактор: Жана Ацеска