Јужна Кореја го запира увозот на иранска нафта
26 јуни 2012Со тоа Јужна Кореја е првиот голем азиски потрошувач на иранска нафта кој ги запира набавките. Владата во Сеул ќе се обиде да ги минимизира ефектите врз домашната индустрија и економијата поради запирањето на увозот на иранската нафта.
„Увозот во Јужна Кореја на иранската нафта ќе биде прекинат, бидејќи и ЕУ ќе го запре увозот, а исто така и ќе го запре осигурувањето и реосигурувањето на увозот на суровата нафта од први јули“, стои во заедничката изјава на јужно-корејските министерства за економија, финансии и надворешни работи.
ЕУ вчера официјано стави ембарго на увозот на нафта од Иран, кое ќе стапи во сила на први јули, со цел да се изврши поголем притисок врз Техеран да ја ограничи нуклеарната програма. Европските влади го предупредија Иран и дека можно е да се стави дополнителен притисок, ако земјата продолжи да им пркоси на меѓународните барања за ограничување на својата нуклеарна програма.
ЕУ и САД го обвинуваат Иран за обиди за создавање нуклеарно оружје. Техеран одговара дека програмата е единствено за цивилни потреби.