Ѕвездите на саемот за автомобили во Детроит

Експертите трвдат дека новата Ц-класа од Дајмлеровата компанија Мерцедес е најважната светска премиера на германските автопроизводители во Детроит. Автомобилот, кој првпат ќе се произведува и во САД, ќе биде пресуден за тоа дали Мерцедес ќе опстане во врвот на пазарот на луксузни автомобили во САД.

Најголемата конкуренција за Мерцедес доаѓа од Германија. Ауди, на пример, „дава полн гас“ и освојува нови делови од американскиот пазар. Во Детроит компанијата од Инголштат го претставува овој модел на автомобил, кој важи за симбол на модерен дизајн. Тој е направен за сите улици и патишта.

Баварците во американската автомобилска метропола откриваат три свои нови адути. Претставени се M4-Coupé (на фотографијата), потоа лимузината M3 и купето од серијата 2. Сите модели од серијата М имаат мотор со неверојатни 431 коњски сили. Но на саемот се прикажани и електромобилите i3 и i8 - за мирна (еко)совест...

Компанијата Мини, зад која стои БМВ, во Детроит се прикажува во ново руво. Дизајнот е грижливо унапреден, моторите се целосно обновени. На американскиот пазар пролетва веќе ќе се појават новите автомобили на Мини. Големо прашање е дали Американците можат воопшто да се навикнат на толку мали возила. Во 2013 година, како и да е, се продадени 66.000 автомобили.

Спортските автомобили од Цуфенхаузен и натаму се продаваат одлично во САД. Тоа за Порше е и натаму најголем пазар. Во Детроит овој автопроизводител ја прикажува најновата генерација на Тарга. Станува збор за прочуената 911-ка со попречен држач на покривот. Првиот модел на Тарга излезе на пазарот уште во далечната 1965 година.

Порше или Ауди се многу успешни во САД, но нивниот концерн мајка - Фолксваген го мачат грижи. Тој минатата година во САД загуби удел од пазарот. Една од причините е и што моделот со седум седишта Crossblue, претставен уште минатата година, сѐ уште не се појавил на пазарот. На овогодишниот саем светска премиера има моделот Beetle Dune.

Марката на автомобили која традиционално се врзува за Шведска веќе извесно време му припаѓа на кинескиот производител Geely. Таа компанија се грижи за свеж доток на пари, а во сѐ останато Швеѓаните имаат полна слобода. Тоа е видливо и кај новиот концепт XC Coupé, претставен премиерно во Детроит. Тој ја прикажува новата архитектура на идните модели на оваа марка.

Адут на Џенерал Моторс е Corvette Z06 за 2015 година. Производителот тврди дека е ова најмоќната верзија на иконата на американските спортски автомобили. Под хаубата се променети многу нешта. Моторот од 620 коњски сили го фрла во сенка својот претходник од „само“ 512 коњски сили.

Форд Мустанг со четири, наместо како што е вообичаено со шест цилиндри? Тоа не е можно! Фановите протестираа на овој начин откако во јавноста се појавија гласини за новиот модел. А сега Мустангот со EcoBoost-мотор, со четири цилиндри, е тука! Значи можно е, а и доволно е за 309 коњски сили.

Својата светска премиера Lexus RC ја имаше во ноември, во Токио. Сега во Детроит во фокусот е верзијата Ф на спортското купе со две врати. Под хаубата - 450 коњски сили, за што е потребен мотор од пет литри, се разбира запремнина, а не потрошувачка.