1. Прескокни до содржината
  2. Прескокни до главната навигација
  3. Кон други страници на DW

Шпанската принцеза Кристина мора да се појави пред суд

Александар Методијев/ројтерс/афп/миа7 јануари 2014

Шпанската принцеза Кристина, најмалата ќерка на шпанскиот крал Хуан Карлос, е осомничена за затајување данок и за перење пари. Тоа е само уште еден скандал во некогаш омиленото, а сега сѐ понепопуларно кралско семејство.

https://p.dw.com/p/1AmT1
Фотографија: picture alliance/AP Photo

Истражниот судија Хозе Кастро подготви обвинение на 200 страници, по долга истрага која, според него, потврдила дека 48-годишната принцеза Кристина направила криминални дела. Тој ја повика принцезата да се појави пред судот во Мајорка на 8-ми март, со што го поплочи патот за судски спор без преседан кој се однесува на шпанското кралско семејство. Кристина ќе биде првиот директен наследник на кралот кој се појавува во суд под обвинение за некаков престап.

Таа се поврзува со бизнисите на нејзиниот сопруг Ињаки Урдангарин, кој се наоѓа под истрага поради обвиненија за злоупотреба на јавни фондови. Адвокатот на принцезата, Мигел Рока, изјави дека ќе поднесе жалба, бидејќи е „апсолутно убеден во нејзината невиност“. Сопругот на принцезата, кој е и поранешен олимпиец и ракометар, беше обвинет за измама, даночно затајување, фалсификување на документи и злоупотреба на шест милиони евра од јавни фондови преку неговата добротворна организација, која организира и бизнис-конференции во Мајорка и насекаде низ Шпанија. Наводно, тој парите од сметките на фондацијата ги префрлал на сметки на приватни компании. Постои сомнение дека Урдангарин наплатувал непостоечки услуги и така ги полнел приватните сметки. Урдангарин ги негираше обвиненијата.

Spanien Korruptionsskandal Königshaus
Принцезата Кристина фотографирана со својот сопруг Ињаки УрдангаринФотографија: picture-alliance/dpa

Скандалот со принцезата се случува во моменти на намалена поддршка од населението за кралското семејство. Последна анкета, објавена во неделата (05.01.2014) покажува дека две третини од Шпанците сакаат кралот Хуан Карлос да абдицира по минати 38 години на тронот и него да го предаде на синот, принцот Филипе, кој сепак ужива одредена поддршка во јавноста и не е погоден од скандалот на сестра му. Угледот на кралското семејство беше нарушен и од други скандали, како покажувањето екстравагантност и ицидентот со ловењето слонови на патувањето во Африка во врвот на економската криза во 2012 година.