Шведска неприкосновена на Евросонг, Калиопи на 13-то место

Прогнозите на фановите, новинарите и обложувалниците навестуваа дека Евросонг наредната годна ќе биде одржан во Шведска. Победата на 28-годишната пејачка Лорен Зинеб Нока Талхаоуи не е спорна. Дури и во самата Кристална сала, која за неполни девет месеци во Баку за шест милиони евра ја изградија токму Германците, атмосферата и реакцијата на публиката навестуваше која е победничката композиција. И самите Азербејџанци кои со бодови ги поддржаа Русите и Турците, пред финалето се изјаснија дека би требало да победи Шведска.

За победникот одлучуваше и жири и публиката

„Се чувствувам прекрасно и се‘ ми изгледа нестварно. Како да ќе исчезне за неколку часа. Во секој случај сум среќна. Како ќе ја прославам победата? Не сум некој кој сака журки, но ќе се забавувам и ќе ја славам, зашто напорно работев на сево ова“, изјави Лорен.

За победникот како и претходните години одлучуваа стручни жири-комисии и публиката со испраќање СМС и телефонски пораки.

Следниот Евросонг ќе биде одржан на 18. мај 2013. година, а каде точно, не се знае.

„Знаеме дека ќе биде во Шведска, но не и во кој град, зашто во игра се повеќе градови кои имаат соодветна инфраструктура“, изјави Кристер Бјоркман, шефот на шведската делегација.

Прецизни прогнози

Прогнозите кои со недели претходно го предвидуваа победникот овојпат беа доста прецизни во однос и на второто и третото место. Руските Бурановски бабушки анимираа голем број Европејци. Трет беше претставникот на Србија, кој ја посакуваше победата како и во 2004. година во Истанбул. Но, овојпат му се „лизна“ и вицешампионското место. Песната „Љубовта не е предмет“ со 12 поени ја поддржаа Бугарија, Хрватска, Црна Гора и Словенија, а Србија пак своите 12 поени и‘ ги додели на македонската претставничка Калиопи.

Норвежаните-последни

Со најголем дебакл оваа година се соочи Норвешка, нејзиниот претставник Тооји остана последен со само 26 бода, а убедливо најдобро организирана дијаспора овојпат имаше Албанија, чија претставничка, пејачката од Косово, Рона Нишлију се најде на петто место.

Претставничката на БиХ Маја Сар го освои 18. место. Големата ѕвезда од Македонија, Калиопи со песната „Црно и бело“ беше поуспешна и со добиените 71 поен стигна на 13. место. По неколкугодишна пауза, Калиопи на Македонија и‘ обезбеди настап во финалето на Евросонг.