1. Прескокни до содржината
  2. Прескокни до главната навигација
  3. Кон други страници на DW

Чевли за менаџери

Лара Зилман / Елизабета Милошевска Фиданоска30 октомври 2012

Тие се елегантни, а сепак удобни - чевлите за менаџери се идеја на германски претприемач кој ветува дека и по цел ден стоење и одење, стапалата нема да болат!

https://p.dw.com/p/16UrS
Фотографија: Fotolia/babimu

Секојдневни сцени во центарот на Минхен. Бизнисмени итаат од еден термин на друг.

Така му било и на поранешниот менаџер Матијас Вебер. Неговиот работен ден завршувал секоја вечер со стапала што болат. Затоа дошол на идеја да направи бизнис-чевли, кои ќе бидат и модерни и удобни.

„На идеја за Вебер-чевлите не дојдов сам. Тоа беше група колеги на еден саем во Кина кој беше многу напорен и вечерта во хотелското лоби си рековме дека не е можно да нема класични чевли за мажи кои се удобни како патики. Јас реков дека ќе се позанимавам со тоа“, раскажува Вебер.

Männer Männerschuhe Straße Füße laufen Männer in Schwarz Anzugträger
Цел ден во елегантни чевли најчесто значи - стапала што болатФотографија: Fotolia/Davidundderriese

На својот модел на чевли работел речиси две години, со поддршка на тим експерти, составен од ортопеди и дизајнери на чевли:

„Работевме многу на стабилноста на чевелот. Многу се лепи, се шие, има многу кожени компоненти кои се вградени и кои го прават чевелот флексибилен, а сепак стабилен.“

Вебер совети добивал и од спортскиот научник Хенинг Штајнер. Надворешниот дел од чевелот е од телешка кожа, додека внатрешниот дел, кај влошката, е пополнет со специјален вештачки материјал кој често се употребува кај патиките.

„Јас како спортски научник кога го видов чевелот бев веднаш воодушевен затоа што тој е апсолутно нетипичен за бизнис-чевел, екстремно е флексибилен, има релативно мек заден дел, кај петата, а тоа според моето искуство се и најголемите слабости на бизнис-чевлите“, објаснува Штајнер.

Внатрешноста на чевелот нуди повеќе простор од вообичаените чевли за мажи. Тоа овозможува и ставање дополнителни влошки. Вебер нагласува:

„Клиентите кон кои сум насочен се мажи на возраст од 35, 40 години, кои немаат веќе идеална тежина, но кои се занимавале многу со спорт и кои велат - сакам да сум класично облечен, но кои полагаат многу на тоа да имаат удобни чевли.“

Symbolbild Toleranz
Чевлите на Вебер се комбинација на елегантен чевел и патикаФотографија: Fotolia/Sebastian Krüger

Чевлите на Матијас Вебер од април годинава се на пазарот. Може да се купат во продавниците за чевли во големите германски градови, а еден пар чини меѓу 250 и 300 евра.

„Порано имавме други марки чевли, кои се‘ уште ги имаме, но кои во внатрешноста не се вакви, не се толку удобни и ја немаат комбинацијата - елегантни, а сепак удобни“, нагласува продавачката на чевли Елеонора Шулер.

За колекцијата Пролет 2013 претприемачот Матијас Вебер веќе разви нов прототип, со кој сака да ги привлече и помладите.