Холандија го избра проевропскиот курс
13 септември 2012
Десно либералната владина партија Народна партија на слободата и демократијата победи на предвремените парламентарни избори во Холандија. Партијата на Марк Руте освои 41 од вкупно 150 мандати. Досегашниот премиер на Холандија Руте и лидер на либералната десноцентристичка Народна партија на слободата и демократијата веќе прогласи победа на предвремените парламентарни избори.
Социјалдемократите со кандидатот Дидерик Самсом се втора политичка сила во земјата. Тие освоија 39 мандати. Самсом го призна поразот и соопшти дека телефонски му честитал на Руте за победата.
Евроскептичарите не добија поддршка. Големи загуби претрпе десниот популист Геерт Вилдерс, кој во изборната кампања се заложи за истапување на Холандија од Европската унија и еврото.
Овие резултати би овозможиле владина коалиција меѓу партијата на актуелниот премиер и социјалдемократите. Руте вети дека веднаш ќе ги направи првите чекори за составување на новата влада, но не посочи кон кои партии ќе се обрати за формирање на владеачката коалиција.