Француските трупи убиле стотици исламисти во Мали
6 февруари 2013Франција ќе почне да го намалува бројот на своите војници во Мали од март „доколку се‘ оди според планот“, изјави шефот на француската дипломатија Лоран Фабиус во интервју за весникот „Метро“.
Во моментов во Мали има 4 илјади француски војници.
„Франција не планира трајно да остане во Мали. Африканците и Малијците треба да гарантираат за безбедноста, територијалниот интегритет и суверенитетот на земјата“, рече францускиот министер.
Тој додаде дека Французите постепено ќе и‘ го предаваат раководството на Африканската воена мисија, но француските трупи ќе продолжат да делуваат на северот на земјата каде се‘ уште има делови во кои се кријат терористи.
Француските власти соопштија дека повеќе стотици исламски милитанти биле убиени во тринеделната воена интервенција во Мали. Тие загинале при воздушни напади врз конвоите со камиони со кои биле превезувани луѓе и воени материјали, но и во директните борби во неколку градови.
На француска страна загина еден пилот на хеликоптер, кој бил смртно погоден уште на првиот ден од операциите во Мали, на 11. јануари. Официјалните претставници на Мали досега не соопштија бројки за жртвите.
На североистокот на Мали, во областа Кидал, како зајакнување на француските трупи пристигнаа и 1.800 војници од Чад. Кидал досега важеше за упориште на вооружената исламистичка група Ансар Дина.
Француските трупи сега трагаат по лидерите на исламските радикали кои се засолниле во планините Ифогас, северно од Кидал, во близина на границата со Алжир.
„Нарко-терористичките групи се запрени благодарение на нападите. Но, може да има натамошни поединечни акции. Треба да се биде внимателен, во Мали, како и во соседните земји. Секој треба да биде свесен дека ризикот е се‘ уште присутен“, рече Фабиус.