Укинат имунитетот на пратеници на Златна Зора

Пратениците на Златна Зора го напуштија парламентот пред гласањето за одземање на имунитетот на шест нивни колеги, што беше едногласно прифатено. Грчките власти тврдат дека таа партија функционира како криминална организација, додека од Златна Зора одговараат дека случајот е политички мотивиран.

„Мене ме прогонуваат поради она во што верувам, а не поради она што го правам“, изјави во пресрет на гласањето Панајотис Илиоплос, еден од пратениците кому му беше укинат имунитетот.

Тројца други членови на Златна Зора, меѓу нив и партискиот лидер Никос Михалолиакос се наоѓаат во притвор каде го очекуваат судењето под обвиненија за раководење и учество во криминална група.

По избувнувањето на грчката финансиска криза, дотогаш маргиналната про-фашистичка партија Златна Зора успеа на изборите во 2012. година да освои 18 пратенички места во 300-члениот парламент. Партијата денес е трета според популарност во Грција, но негира дека негува симпатии кон нацистички вредности, иако голем број нејзини членови отворено ги покажуваат таквите симпатии.

Преиспитувањето на активностите на партијата започнаа по убиството на 34-годишниот музичар и левичарски активист Павлос Фисас. Лицето кое беше уапсено на местото на злосторството призна дека го сторило убиството и дека е вклучено во активности на Златна Зора.

Ниту еден од шестмината пратеници на кои им беше одземен имунитет нема да биде обвинет за убиството на Фисас, но ќе бидат обвинети за учество во криминална група и за вознемирување на јавноста.