Трепет пред налетот на орканот „Ксавер“

Метеоролозите прогнозираат дека врз германското крајбрежје во Северно Море ќе удрат ветрови со бризина од 140 километри на час.

Запрени се фериботите, што опслужуваат некои од германските острови во Северно Море, а националниот железнички превозник „Дојче Бан“ предупреди дека е можно да се наруши движењето на возовите во делови од северна Германија. Германската авиокомпанија Луфтханза ги откажа сите летови во Хамбург денеска по 14 часот. Аеродромот Франкфурт засега не воведува откажувања, портпаролка изјави дека ќе ја следат ситуацијата и ќе реагираат ако е потребно.

Силните ветришта без струја оставија над 20 илјади домови во Шкотска, а го запреа и железничкиот сообраќај. Голем дел од северозападна Европа е зафатена од бура, која се очекува да донесе поплави долж крајбрежните реони и да го парализира сообраќајот.

Удари на ветрот од 183 километри на час беа измерени во северниот дел на Шкотска, каде многу патишта и мостови се затворени. Откажани се и голем број летови. Централната железничка станица во Глазгов е евакуирана откако се урна дел од стаклениот покрив, но, за среќа, во инцидентот никој не настрада. Британската агенција за животна средина соопшти дека ударните бранови може да предизвикаат значителни поплави долж крајбрежните реони. Браната на реката Темза е крената за Лондон да се сочува од поплава.

Холандија се подготвува за невремето, затворајќи ги водените брани, што земјата ја чуваат од поплави. Кралскиот холандски авиопревозник КЛМ откажа десетици летови за другите европски држави од безбедносни причини.

Германската метеоролошка служба соопшти дека фронтот на бурата, која се‘ уште собира сила, доаѓајќи од Гренланд преку Атлантскиот Океан, во Европа ќе донесе поларен воздух. Тоа значи дека на пониските места може да донесе и снег.