Тренинг за фризери како за врвни спортисти
25 јуни 2013Фризерите кои се дел од германскиот национален тим секојдневно тренираат во Кобленц. Јулијан Вагнер, фризер од Зинциг, вели:
„Моја цел е, се разбира, да станам светски првак.“
За таа цел Јулијан Вагнер тренира од почетокот на годинава: „Се тренира секое утро, секоја вечер и на викендите. Понекогаш може да си дозволиш и нешто друго, но потоа... На викендот бевме излезени и сите продолжија со забава, а јас послушно си заминав рано и си легнав.“
Правење фризури како врвен спорт. Околу 30 мажи и жени се дел од германската репрезентација. Јоахим Волф е сојузен тренер на фризерите. Повеќе пати бил светски првак и знае што се бара на првенството:
„Предниот дел е многу убав, со овие нежни елементи. Токму тоа е она што ни е потребно, што ни носи поени кај судиите - нежноста, играта со структури.“
Тренерот смета дека 22-годишниот фризер Јулијан има шанса на Светското првенство. Пунџи со малку егзотика.
„Сакаме да покажеме што може да се направи со материјалот - коса. Сакаме да ја исцрпиме оваа тема - боја, форми, начин на потстрижување, височини и длабочини, сето тоа сакаме да го оформиме во скулптура за која ќе се рече - ова е висока уметност“, вели Волф.
Таквите фризури меѓутоа не се за секој ден, колку и да се убави. Јулијан Вагнер мора повторно да се обиде. Тренерот од него бара милиметарска прецизност.
„Еднаш ми рече - овде сакам четири или три влакна наместо пет. Малку се насмеав, а тој рече - не, сериозен сум. Навистина деталите одлучуваат. Токму тоа потоа и‘ дава леснотија на фризурата.“
Тој мора најмалку петпати дневно да ја расипе и повторно направи фризурата. За среќа, куклите се потрпеливи од луѓето.
„Таа не писка кога тегнам“, вели со насмевка Јулијан.
Тој инаку работи во фризерскиот салон на мајка му. Затоа и може да си дозволи да биде дел од репрезентацијата. Зашто, овде пари не добива никој. Затоа, пак, титулата светски првак потоа е исплатлива. Јулијан затоа тренира вредно и со големо темпо до Светското првенство во мај 2014 година во Франкфурт.