Стотина жртви на бродолом во Индија
1 мај 2012Повеќе од 100 луѓе загинаа, а 50 се водат како исчезнати при потонувањето на траект во Индија. Бродот со околу 300 патници се превртел во река во североисточниот дел на Индија, откако го зафатила бура со силни ветрови и пороен дожд. Спасувачките екипи, војската и полицијата се испратени на местото на несреќата, но спасувачките операции се забавени поради невремето, дождот и слабата видливост. Патниците седеле на покривот на траектот, кој превезувал претежно локални фармери и нивните семејства.
Несреќата се случила на Брамапутра, една од најголемите индиски реки во близина на Факираграм во индиската држава Асам. Траектот тргнал од местото Дубри и пловел кон дискриктот Факирганџан, каде се случила несреќата. Очевидци тврдат дека траектот бил стар и најпрво се превртел, а потоа се преполовил на два дела.