Србија прифаќа Косово да игра пријателски натпревари без државни обележја
29 ноември 2013
Претседателот на ФСС Томислав Караџиќ, како што пишува „Политика“ наредната недела на конгресот на Светската фудбалска федерација (ФИФА) ќе пренесе дека Сојузот нема да има ништо против Косово да игра пријателски натпревари, но без државни симболи.
Светската фудбалска организација - ФИФА минатиот месец го одби барањето на претседателот на ФС на Косово Фадиљ Фокри репрезентацијата на оваа земја да игра официјални натпревари, што беше поздравено од раководните луѓе во српскиот фудбал.
„ФИФА нема да дозволи Косово да игра официјални натпревари се‘ додека државата не стане членка на Обединетите нации. Правилникот е сосема јасен и ние нема да дозволиме негово прекршување“, изјави претседателот на ФС на Србија Томислав Караџиќ.
Сепак, тој додаде дека Србија се залага за развој на фудбалот на Косово и поради тоа младите селекции на оваа земја, како и женските репрезентации, имаат дозвола да играат пријателски натпревари со земјите кои ги имаат признаено.
Во меѓувреме претседателот на ФС на Хрватска Давор Шукер најави можен пријателски дуел со Косово во Приштина, во првиот слободен термин на ФИФА. За разлика од дозволата на Косово да игра пријателски натпревари, и покрај барањето, ФИФА се‘ уште нема дадено дозвола на сениорската репрезентација на Република Српска да одигра пријателски натпревар со Србија.