Со кого Груевски ќе состави влада?

„Република Македонија успешно го положи тестот што требаше да го положи и сметам дека вкупната оценка за изборите одржани на 1-ви и на 15-ти јуни е позитивна“, оцени претседателот на Државната изборна комисија, Јован Јосифовски.

Повтореното гласање, кое се одвиваше под будното око на набљудувачите и дипломатите, се одржа во 183 избирачки места од вкупно 187, а одзивот изнесувал 48,9%.

Оценката на меѓународните набљудувачи е многу попозитивна од претходната, дадена по гласањето на први јуни. Изборите вчера покажаа значително подобрување по клучното прашање на безбедноста, изјави Пиа Кристмас Молер, специјален координатор на краткорочните набљудувачи на ОБСЕ. Според шефот на долгорочната набљудувачка мисија на изборите на ОБСЕ/ОДИХР, Роберт Бери, државните институции треба да сторат повеќе и да побараат одговорност од сторителите на акти на насилство и казниви дела поврзани со изборите, вклучувајќи и отстранување партиски активисти кои вршат високи политички функции.

ДУИ, инаку, по трет пат е победник кај албанскиот електорат и бара да биде дел од новата коалициона влада. Но, ДПА и Мендух Тачи беа досегашниот традиционален партнер на ВМРО ДПМНЕ. Како ќе изгледа влада е неизвесно, но едно е сигурно – премиерот Никола Груевски ќе биде под голем притисок.