Снежната бура во САД однесе човечки животи
4 јануари 2014Повеќето од жртвите настрадаа во сообраќајни несреќи по лизгавите коловози, една жена заболена од Алцхајмеровата болест се смрзнала откога залутала по излегувањето од својот дом, а еден работник беше затрупан со куп сол, наменет за расфрлање по патиштата. Спасувачките тимови во Њујорк и Бостон патролираат по улиците во потрага по бездомници, кои би можеле да се смрзнат.
Поради невремето вчера (3.01) беа откажани 2.200 лета низ целата земја. Гувернерите на Њујорк и Њу Џерси прогласија вонредна состојба, повикувајќи ги граѓаните да останат дома.
„Со оглед на тоа дека снежната бура е се‘ посилна и носи големи количества снег, силно апелирам до сите њујорчани да бидат внимателни, да избегнуваат патување и да не излегуваат надвор ако не мораат“, изјави гувернерот на државата Њујорк, Ендрју Куомо. Стотици училишта во Бостон и Њујорк се затворени и е продолжен распустот за десетици илјади ученици.
Снежното невреме претставува прв голем тест за новиот градоначалник на Њујорк Бил де Блазио, кој на должноста стапи пред два дена.
Тој рече дека општинските власти се подготвени да се справат со невремето, но ги повика граѓаните да останат во своите домови, а ако мораат да излезат да користат јавен превоз. Тој соопшти дека на улиците на Њујорк се распоредени 1.700 возила за расчистување на снегот и 450 возила за посипување сол по улиците.
Синоптичарите проценуваат дека поради студениот ветар во некои делови од земјата температурата може да падне и на минус 23 степени. Студен воздушен бран веќе доаѓа од Канада. На крајот на викендот се очекува друг студен бран.