Светот во трка за помош на Филипините

Четири дена откако супер тајфунот Хаијан уништи повеќе крајбрежни градови во централните делови на Филипините, вистинските размери на катастрофата се‘ уште не се во целост познати, иако досегашните извештаи укажуваат на катастрофална состојба.

„Го очекуваме најлошото. Како што минува времето откриваме сѐ поголема трагедија и се‘ поголем број загинати“, изјави директорот за хуманитарни операции на ОН, Џон Гинг. Филипинскиот претседател Бенињо Акино веќе прогласи вонредна состојба во земјата.

Обединетите нации сметаат дека 10 илјади луѓе загинале само во градот Таклобан, главен град на провинцијата Лејте, каде цунами бранови буквално збришале цели населени места.

Околу 10 милиони луѓе, или 10 проценти од населението на Филипините е погодено од катастрофата, а околу 600 илјади ги загубиле своите домови, проценуваат ОН.

Спасувачките екипи немаат ни доволно кадар, ниту ресурси за да обезбедат храна, вода и медицински материјали за настраданите подрачја. Најголем број од преживеаните се во очај, без надеж дека ќе успеат да излезат од катастрофалната состојба.

„Тука не остана ништо за нас. Нашите домови ги нема, немаме пари, документи... ништо“, изјави за АФП 48-годишната Карол Мампас, додека се обидува да замине од земјата на аеродромот во Таклобан, заедно со својот неколкумесечен син.

Поројните дождови во текот на ноќта дополнително ја влошија состојбата, а се заканува и нова тропска бура на југот на земјата. Владата воведе полициски час во текот на ноќта, откако бројни локални банди се обидоа да ја искористат ситуацијата и да ограбуваат во напуштените домови и продавници. Разместени се и специјални воени сили.

Невидено уништување

Помошта од меѓународната заедница пристигнува, но засега е далеку од потребните стотици милиони долари, колку што побараа претставниците на ОН. САД и Велика Британија испратија воени бродови со илјадници војници кон земјата, кои треба да обезбедат полесно распределување на хуманитарната помош и медицинска нега за настраданите. Помош ветија бројни земји од светот, меѓу нив и Кина, иако двете земји се наоѓаат во жесток територијален спор.

Одлуката на претседателот Акино за воведување вонредна состојба и‘ овозможи на владата да воведе контроли на цените и да ги отвори вонредните фондови.

Американските спасувачки екипи кои меѓу првите пристигнаа на островот Самар говорат за невиден хорор. Тајфунот Хаијан тука удри со најголема јачина, со ветрови од околу 315 километри на час. Воздушните фотографии од регионот покажуваат речиси целосна уништеност. „Патиштата се непроодни, сите дрвја се паднати, инфраструктурата е уништена, нема струја. Не сум сигурен како да го опишам ова уништување“, изјави американскиот бригаден генерал Пол Кенеди.