Решението за името е клуч за напредок на Македонија

Клучните предизвици за Македонија во 2010 година се однесуваат на решавање на спорот со името, што ќе и‘ овозможи на земјата да продолжи да ги реализира одамна зацртаните цели, е пораката на дел од најважните странски амбасадори во земјата. Американскиот, Филип Рикер, европскиот Ерван Фуере и Марија Анхелес Луис Гарсија де Лара, шпанска дипломатка во улога на вршител на должноста амбасадор на земјата- актуелен претседавач со Унијата.

Дамата ги претстави приоритетите на шпанското претседателство. „Дел на третиот приоритет посветен на надворешната политика на Европската унија се однесува на зајакнување на европските перспективи на Западниот Балкан. Ние ги охрабруваме таквите напори и ќе го истражиме прашањето за отворање на преговори за членство со Македонија“, изјави шпанската дипломатка.

Американскиот амбасадор Филип Рикер ја нагласи американската поддршка за Македонија. Рикер потсети колку САД инвестирале во економското и политичко зреење на современата македонска држава и ги повика македонските водачи да го решат единствениот проблем што се испречува пред натамошното напредување на земјата. Побара активност за решение на спорот за името до јуни. „Во првата половина на 2010 очекуваме од македонските лидери да го стават ова прашање на маса и да го решат проблемот што се влече повеќе од 18 години. Нема да има подобар момент за тоа од сега“.

Странските дипломати ги охрабруваат двете страни, но се оградуваат од давање предлози и идеи како да се стаса до решение на компликуваниот спор. Европретставникот Ерван Фуере е оптимист дека рецепт за компромис постои и верува дека лидерството ќе успее да го најде. „Секако, решението ќе бара визија, лидерство и храброст, но секако тоа се очекува од водачите избрани да го сторат тоа, да водат, да покажат лидерство и храброст за да се постигне решение кое ќе и‘ овозможи на земјата да продолжи на својот пат до целосна интеграција во ЕУ и НАТО“.

Од трибина на која странските дипломати расправаа за предизвиците со кои ќе се соочи Македонија годинава произлезе нова временска рамка за решавање на спорот за името. Првите шест месеци се периодот за тоа. Рокот што го определи Рикер по враќањето од Вашингтон се совпаѓа со бројните посети на странските државници и дипломати кои нудат помош за посредување и поддршка во спорот со Грција.

Автор: Горан Петрески

Редактор: Александра Трајковска