Работнички не успеа да се пласира во Лигата на шампионите

Македонскиот претставник Работнички ќе учествува во Купот на УЕФА, откако и во Скопје доживеа пораз од францускиот фудбалски прволигаш Лил – овој пат со 1 спрема 0 - и не успеа да се пласира во Лигата на шампионите. Подвиг и не можеше да се очекува, оти Лил како домаќин во првиот натпревар си обезбеди убедлива предност од 3 спрема 0.

Изненадување се случи синоќа во Амстердам: Ајакс кој во првиот натпревар како гостин славеше победа од 2 спрема 1, дома загуби од данскиот претставник Копенхаген со 2 спрема 0, па славниот холандски тим нема да биде меѓу учесниците во Лигата на шампионите.

По синоќешните реванш-средби место во најквалитетното европско клупско натпреварување си обезбедија и Спартак и ЦСКА од Москва, Галатасарај Истанбул, Стеауа Букурешт, Динамо Киев, Шахтјор Доњецк, АЕК Атина, Левски Софија и Арсенал Лондон.