Путин не сака мешање од странство

Рускиот претседател Владимир Путин нема да дозволи лекции од западните земји по прашањето на демократијата:

„Директни или индиректни странски вмешувања во нашите политички процеси не се дозволени“, изјави тој кратко и јасно.

Путин со тоа јасно одговори на критиката на неодамна усвоениот закон според кој соработниците на невладини организации кои добиваат пари од странство, ќе бидат регистрирани како „странски агенти“.

„Оние кои добиваат пари од странство и им служат на странските интереси, не треба да се ангажираат во руската политика“, побара 60-годишниот шеф на државата во големата сала во Кремљ пред стотиците гости во Москва. Ова беше првиот јавен говор на Путин по неговиот повторен избор на чело на државата во март.

Тежиште на неговиот говор за состојбата на нацијата беа социјалните прашања. Тој вети отворање нови 25 милиони работни места како и поттик за вработување на наставници, лекари и инженери. Путин освен тоа побара „повторно раѓање на националната самосвест“. Русија страда од „недостаток на духовен стожер“. Затоа е потребно зајакнување на моралната и духовната основа на општеството, смета Путин, најавувајќи истовремено налог до институциите да го претставуваат „националниот и спиритуелен идентитет“ на Русија. Со тоа веројатно Путин алудира на Руската православна црква, која треба да добие уште поголема државна поддршка. И руската војска ќе биде дополнително поддржана, најави тој, со што ќе се гарантира независноста и безбедноста на земјата.